admin
Mehleli Dube
Incwadi eNgcwele iyakufakaza njalo iphinde ixwaye ukuthi hlonipha uyihlo lonyoko ukuze insuku zakho zande ezweni. Inengi labantu sikuthatha lula nje, siwuthathe njengomyalezo ongatsho lutho ngoba sikholwa ngokubona njengoThomas.
Sithi nxa siphila, mhlawumbe sesithe saphumelela empilweni singaze salalela izeluleko ezivela kubazali ngoba kwesinye isikhathi sibeyisa, ngoba sesifunde ukwedlula bona, sikhohlwe ukuthi siyikho esiyikhona njalo lesilakho ngenxa yabo.
Ngikhumbula omunye umngane wami wathi ngoba esenothile okwamagama, abazali bakhe wayebenza unobhutshuzwayo, engabalaleli ethi ngoba wayeqeqetshile njalo enothile, wayekholelwa ukuthi njengoba engumali iyavuza ngeke adinge usizo kubo engabananzi njalo elenhliziyo elukhuni kibo.
Abantu abanengi bakwazi ukuthi ngabazali bakhe mhla bengcwatshwayo ngoba kusukela kumabhokisi wabathengela avela phetsheya kwezinlwandle, ezengendizamtshina, ebucwazicwazi lawe uze ubelenhloni ukulithinta uthi mhlawumbe ungalingcolisa, ukudla kwayintaphane, badla bakutshiya abantu, sekungani ngumantshwane esesuzele ibhotshi afice lehlisile lilembiza ezintathu.
Bakhuza bababaza abenkosi, kanti yena ekwenza lokho wayezidla izibindi ngoba ezithonisisa ekwazi kamhlophe ukuthi kwakumele ebanakekele besaphila hatshi sebeye kobhekabezayo. Akuqedanga iminyaka emingaki ibhizimusi lakhe laqala ukudilika, latshabalala angani yinkungu ibalekela insaba zelanga likaMpandula. Yamudla linto kwaze kwambangela isifo senhliziyo walandela, abazali bakhe kogoqanyawo.
Banengi lawe obaziyo abangasekho njalo abanye ngabasemajele lezinkingeni ngenxa yokutshaya indiva izeluleko ezivela kubazali.
Ayixabene.
0714355641
Online Reporter