admin
UKULIMA yinto eqakathekileyo kakhulu empilweni zabantu ikakhulu labo abahlala emakhaya lasemapulazini. Kuqakathekile ngoba olimileyo kathengi impuphu. Olimileyo kafi ngendlala ngoba ulakho ukudla; umumbu, amabele, amakhomane. Ulakho njalo ukuthi uma esevunile azidlele umxhanxa, inkobe aphinde atshebe ngendumba azilime emasimini akhe.
Kuqakathekile ukulima ngoba uma izulu lithe lana kuhle, olimileyo ulakho ukuthi athengise amabele akhe kumbe umumbu athole imali enhle kakhulu.
Ulakho njalo lowo olimileyo ukuthi asebenzise amahlanga uma esevunile ukupha inkomo zakhe ebusika ukuze ziqine zenelise ukuthi zilime njalo ngesikhathi sezulu esilandelayo.
Kuminyaka edluleyo ukuguquka komumo womkhathi sokubangele ukuthi izulu lingani kuhle iminyaka ilandelana osekubangele indlala elizweni leZimbabwe kanye lamanye amazwe aseZansi yeAfrica. Ukungani kuhle kwezulu lokhu kuqhubekela phambili kuphambanisa ukuvikeleka kokutholakala kokudla njalo elizweni.
Ngenxa yalokhu uHulumende kanye lenhlanganiso ezizimeleyo sebumbe indlela entsha eyeNtwasa Gebha udle ngenhloso yokuthi njengoba isikhathi sokulima sesisondele abalimi bazame indlela le entsha okukhangelelwe ukuba ithuthukise isivuno sesigaba sokulima sika 2020/21.
Indlela le entsha ifana xathu lale abantu akade beyibiza ngo gatshompo lapho okugejwa khona amagodi, kufakwe umquba kube sekugqitshelwa kancane kulindelwe ukuna kwezulu ukuthi kuhlanyelwe.
Ngakho ke kuqakathekile ukuthi abalimi abangathandi ukukhala kwelakusasa bahambe kubalimisi abaseduzane labo bayezwisisa ngale indlela yokulima okukhangelelwe ukuthi ivimbe indlala kumnyaka ozayo abantu bake bakhombe ngophakathi ngoba sebewusebenzise kuhle umhlabathi.
Kuhle ngoba njalo abomkhathi sebekhulumile ukuthi izulu likhona kusigaba sokulima salonyaka.
Kungumbono waleliphephandaba ukuba abalimi bangasukumela phezulu bayefunda ngendlela yokulima yeNtwaswa ukudla kungatholakala kumnyaka ozayo elizweni ngoba isikhathi sokulungiselela sisekhona.
Kumele sazi phela ukuthi ukuthuthuka komkhonomi welizwe lakithi kweyeme kugatsha lwezokulima kungakho kungumlandu walabo abalendawo zokulima bonke ukuthi babone ukuba kabalidlalisi leli ithuba ukuze indlala iphele elizweni.
Iqiniso okumele sibelazi yikuba akula enye inotho esingayithola ukwedlula ekulimeni. Lokhu kuyingoba umhlabathi welizwe lakithi uvundile njalo ukhulisa kuhle izilimo ezitshiyeneyo.
Isifiso sethu-ke ngesokuba abantu bancedisane labalimi benze wonke amalungiselelo angabe esenziwa ukwenzela ukuthi mhla izulu litshaya phansi sonke sibobotheke kungabi lomuntu ozabamba ikhanda ahlabe umkhosi.
Online Reporter