Online Reporter
UKUFA yingxenye yempilo, yinto eyaziwa ngubani lobani ophilayo emhlabeni ukuthi ngelinye ilanga uzakuya elizweni lemithunzana.
Ukufa kuvamile ukuhlanganisa ngitsho sibi sabantu abafungelene ijoyi. Ngeviki ephelileyo ngibone ezinye imuli ezimbili zisilwa kubangwa isidumbu. Lamasotsha kaTshaka babengahlehlela emuva ngoba kwakuliwa ngezandla langezikhali, imbokodo zamatshe zazidlalela emoyeni sekungani zinkonjane inyoni zezulu ezindiza emoyeni zithabela ukukhiza kwezulu, ngoba zisazi ukuthi ukuna kwenza amatheza aphume phansi zidle zisuthe.
Kwaba luthuli esililweni lesi. Kwaze kwalamula elinye ilunga lomdeni elagijima laya emapholiseni layamangala. Abomthetho abathathanga sikhathi bafika baqala ngokubiza unkosikazi kamufi befuna ukuzwisisa ukuthi kuyini okungabe kudunge amanzi.
Waveza ukuthi kubangwa indawo lapho okuzabekwa khona umufi. Wachaza ukuthi umufi engakatshoni wayethe ufuna ukungcwatshwa emzini wakhe omutsha, emapulazini, waze wabatshengisa lephetshana ayelibhalile.
Kuthe sekubuzwa abafowabo bona bema ngelokuthi bona umdeni wabo ungcwatshelwa emzini omkhulu lapho abakhulela khona njalo okulele khona oyisemkhulu laboyise.
Unkosikazi kamufi nguye owacina kulandelwa ubufakazi bakhe lakanye umkakhe wayangcwatshelwa emzini omutsha obizwa ngolimi lwabondlebe zikhanyilanga ngokuthi kusema-resettlement.
Abafowabo bakamufi bathe bebona ukuthi sekwehlele nganxanye labo bathi mhlawomngcwabo bayabe bengekho, unkosikazi kamufi wathi kalandaba nanku laloba esegulela ukufa abazange bazikhathaze ngokuza bazombana. Loba abemuli bakhalala umngcwabo, unkosikazi kamufi kunye labantwabakhe babambisana waqhubeka ungcwabo njengesifiso sikamufi.
Zinengi izehlakalo ezinje, uthole imideni isizivoxe edakeni ngezinto ezincane ezifuna nje ukuthi abantu bahlale phansi bakhumisane umlotha. Ukulwa kwamalunga emideni kuhlukumeza umoya womufi okumele ukuthi aphumule ngokuthula.
Ayixabene.
