admin
Silo Mehleli Dube
SOKULEMINYAKA ethize izisebenzi ezinengi sibi samankampani azimele wodwa zingatholi ibhonasi abasiki bebunda bathi kubangelwa yikuntengantenga lokuvilibana kwezomnotho welizwe.
Lonyaka kukhanya izisebenzi ezinengi zizathola isibongo esikhulu sivela kubaqhatshi bazo kunanzwa ukuthi zisebenze kuhle noma bekumnyama kubomvu.
Isimanga izisebenzi ezinengi kakhulu ezingobaba uthola sezikhipha amagingqo ngendlela engaqondanga, izimuli zisidla inqweqwe zomlomo, bona sebelala emahoteleni sekungani emakhaya abo ingubo zilensikizi.
Ngikhumbula omunye umngane wami uDingindawo yena ongasekho emhlabeni, wayethi nxa eholile ibhonasi ngitsho sibi semsebenzini wayengalugxobi nxa ingaphelanga ibhonasi ayevumbuluka eseqamba amanga ethi usuke waya ekhaya bekubhubhe ugogo wakhe ozala unina, etsho ewahutshuza aluhlaza tshoko njengeyenkunzi yenyathi ebulewe ngumahamba ngendlwani.
Wawufica labomahotsha sebendizela kuye, kungani zinyosi ezithapha umhluzi egebhezini lwekhabe.
Wayethi nxa isimhlanyisa imali yebhonasi uzwe ethi phansi lokuya ezulwini, uthole odade abavunule izidwaba ezikhanyisa amakhwapha ezibunu, lamathangazi abo ecwebezela kungani yimbokodo yokuchola idobi, sebedlalela eduze, eqonda ukwenza unyama yembongolo khetha omthandayo.
Banengi ngiyazi abazazithola bekulesi simo, abanye njalo ngabaphonguzwa kusithi kabathenge noma nje bengajonganga ukuthenga (impulse buying).
Abanye njalo ngofica sekuthengwe izidumbu zenkukhu zaba nengi abantwana baphekelwe badle bayitshiye lamathambo bengakhukhuzanga , kwesinye isikhathi uthole okungonkabi sekuze kufuqa umlenze wenkukhu uzwe kuthi vu..vu., kuwenza imota kungazi ukuthi lapho okuhlala khona kusesilojeni.
Azonde umninindlu ngoba yena mhlawumbe etshebe ngebhobola, eselikombile libaba gamu lithengwe emkambo selitshiswe lilanga laze phupha.
Avuke umasitanda ezonde ekhukhumele okonanani otshopolwa zinkukhu, axotshwe umuntu weNkosi, ngoba yena ecabanga ukuthi okumntwana kuthunyiwe ukuthi kumgwabisele.
Kuqakathekile ukuthi singayihola kufanane lanyangazonke, nxa ungothetheyo hamba layo kumkakho lifike libonisane ngenswelo langendingeko zenu, beselithenga ngokuvumelana libona ngaso linye kulapho ozabona njalo uzwe lokuthi ibhonasi imnandi.
Zinengi izinto ezithengwa ngebhonasi ngenxa yokuthi kuyabe kuliholo lakho eliphindwe kabili kulula ukuthi uthenge into okade lokhe isemoyeni wakho.
Abatshadayo laba lobolayo bahle bayibambele esidukwini baqede.
Ungagijimisa omangumba uyabe uzifaka engozini yemikhuhlane ethelelwana emacansini engelaphekiyo ozayithwala uyeyithelela umkakho uthole selikhipha imali enengi elingelayo selidinga ukuzelaphisa lobabili ngenxa yokutshaphaza ibhonasi yona okumele ukuthi ungayithola uwise iphika uzitshele ukuthi kade uligaxile lelijogwe lomsebenzi, ube usuyifaka izinyo imali yakho ngendlela ongasoze uzisole ngakusasa.
Ayixabene.
Umlobi ungamthinta ku: 0714355641
Online Reporter