admin
Ethel Ncube
ZISELE zikhakhamele izakhamizi zeChipale eBinga ngemva kokuba enye indoda ilume umkayo indlebe ngoba eyale lomakhalekhukhwini wakhe.
Indaba le yenzakale emavikini amabili asanda kwedlula lapho uMnumzana Paul Shumba alume umkakhe indlebe uNkosazana Shamiso Sibanda kubangwa ukuba kungani eyale ukuthi umkakhe amukele ucingo lwakhe ngesikhathi lukhala.
Elinye ilunga lomdeni lo, uNkosazana Siza Ndlovu uveze ukuba udaba lolu bazamile ukululungisa.
“Umalukazana wabuya wazokhuluma ukuba umkakhe umlume indlebe efuna ukwamukela ucingo lwakhe obelukhala.
“UShumba simbuza uthe wayefuna nje ukuzwa ukuthi ngubani owayetshayela umkakhe ucingo ebusuku kodwa okokumluma uthi wenza iphutha,” kulandisa uNkosazana Ndlovu.
UMthunywa wenelise ukuxhumana loNkosazana Sibanda owalunywa indlebe ngumkakhe oveze ukuthi umkakhe ulobukhwele.
“Ubaba ucingo lwami lwakhala kungakho yena wayefuna ukuluphendula singavumelananga ngasengisala ngahle ngalucitsha wasengiluma indlebe.
“Ngihle ngafulathela umuzi ngoba kusegcekeni ukuthi ubaba ulobukhwele. Bengivele ngihlezi esithenjini kwesinye isikhathi bengike ngithenjiswe ukuxotshwa kumbe ukutshaywa ngenduku kambe luthando olunjani lolu” kutsho uNkosazana Sibanda.
Iphephandaba likazulu lixhumane loMnumzana Shumba yena othe akukho angakutsho.
“Angilakho engingakutsho kuwe kodwa tshiyana lokomuzi wami,” kuphetha uMnumzana Shumba.
Online Reporter