Online Reporter
ENSUKWINI zayizolo umnotho welizwe ungakantengantengi kangako bekuthi nxa kusiza ikhefu kujabule wonke umuntu osebenzayo ngoba lamankampani amanengi ayevalwa abantu bayephumula bejabula lezimuli zabo.
Kwakujabula sibi sabantwana besikolo ngoba bezahlala amalanga athize bengayi esikolo, omalukazana bona abalamadoda asebenza emadolobheni angikhulumi, bayabe bemanzi te ngokuthaba ngoba omkabo bezakuba semakhaya okwensuku njalo bephathelwe lezifela emlonyeni.
Babesazi ukuba lenhlungu zemvelo zizake ziphunguke ngoba kade lokhe belala bekhaba ingubo bebodwa, phela kuyabe kuzalalwa kuxoxwa kuselukwa amano omuzi.
Lonyaka ngibona kuleli khefu lePhasika elibuyayo kuzakuba njalo nanku phela lezulu linile kukhomba ukuthi abantu abanengi bazayitshaya inala, phela abavela emadolobheni lapho okuthengwa phose yonke into bazafika bazitike balale ngezibomvu. Abanye bavuke bebhodla isibhoho kuthi abalezisu ezilula balale beyatha besiya ngaphandle, umuntu avuke amehlo ewele angani ngawenkomo ecubayo.
Phela kuyabe kudliwe omumbu, amakhomane, amakhabe kwesinye isikhathi kuhlatshwe lentondolo kumbe umthenwa, phela ziyabe zinonile izifuyo uthole inyama yakhona imhlophe ngedanga ungayidla ungani uyayiqabuka kulapho ozalala ususiya zinceda ngemva kwendlu ngoba esambuzi kuyabe sokukhatshana.
Kuthi nxa seliphelile ikhefu lePhasika sekubuyelwa emadolobheni ufice kungasimtshaqana lezijumba jumba phezulu kwebhasi sekuthwelwe imihlobo lokuyakudla phambili, yiso isikhathi othola ledolobho lingcolile ngoba inengi bangadla bajikela izibi loba ngaphi kungaba sesitaladeni kucine kubangela imikhuhlane.
Ayixabene.
