Online Reporter
Bhekimpilo Tshalibe
KULEZIGILAMKHUBA ezimbili zakoBulawayo eziphiwe isigwebo sokuyapika iminyaka engu-19 ndawonye kulandela ukubamba elinye inina elilesitolo eMakokoba inkunzi zimtshontshele i R137 000.
Kubikwa mhlaka 12 Nkwenkwezi ngomnyaka ka-2023 e-Old Luveve uSilence Kwangwa (30) loDouglas Ruzana (32) bacathamela uNoleen Mathuthu, inina elizisebenzayo njalo elilesitolo eMakokoba.
Kuvele ukuthi uMathuthu wavala isitolo sakhe ngo-1600hrs wagada umtshova kuLuveve Road. Kubikwa uMathuthu wehlela koChigumira wasehamba ngenyawo esiya endlini engananzelelanga ukuthi uyalandelwa. Kuzwakale ukuthi uthe esezafika endlini yakhe omunye wabasolwa wamdosa ngejazi wamvala ngayo ebusweni wasemwisela phansi.
Kubikwa umsolwa wamthathela isikhwama esasile R137 000 andubana babaleke ngemota yohlobo lwe-Honda Fit elombala oyisibhakabhaka.
Kuzwakale ukuthi uKwangwa wabanjwa ngamapholisa ehamba ngeHonda Fit yakhe njalo uRuzana waqanjwa nguMathuthu ngesikhathi beku-identification parade. UKwangwa ugwetshelwe ukuyapika iminyaka engu-10 ejele, imota layo ihle yathathwa nguHulumende. Kukanti uDouglas Ruzana ugwetshelwe ukuyapika iminyaka engu-9 ejele.
