Online Reporter
Ungakhangelisisa izinto esezisenziwa ngabantu emhlabeni zitshwaqisa igazi zihlasimulise umzimba.
Akukhethelekile ukuthi zenziwa ngontanga kumbe ngabantu abadala, izolo lokhu besisizwa emsakazweni sibuye sikubale kumaphephandaba.
Insumansumane yendaba eyenzakale edolobheni leHarare, lapho okutholakale abantwana abancane abathathu befile bahlohlelwa ngemva kwemota ekade yafa.
Kuthiwa abantu bazwe ngephunga.
Umuntu ongabe eyenze isihluku lesi engabe ebefuna inotho?
Sokukanengi sisizwa ukuba bakhona osomabhizimusi ababulala abantu benakana ukuba lokhu kuzabalethela inzuzo ephindwe kabili.
Abantu abasesabi ukuchitha igazi bakhohlwe ukuthi incwadi engcwele ekaMvelinqangi ibhayibhili lithi ungabulali. Zinengi izinto ezimbi esezisenziwa ngabantu.
Ngithe ngibala izindaba kumakhalekhukhwini ngadaniswa yikuthi isabelo somhlubulo wemaNdebeleni sihamba phambili ngenani labantwana besikolo abazithweleyo abangaphansi kweminyaka elitshumi lane nxa kuqathaniswa leminye imihlubulo, kambe nxa kuzazithwala ingane engekenelisi lokufinya kuthiwe sengumama kazibani banyana khona lokubonda imbiza engenelisi.
Lokhu kungiqede amandla, ngoma amathe emlonyeni ngoba inengi lalabo bantwana bayabe bengadlwengulwanga kodwa “bevumelene,” isikhathi esinengi ubutshapha lobu busukela kumidlalo yabo leyi abayibiza bathi ngama-vuzu party okugidwa khona ngapha kuthathwa lezidakamizwa.
Kwesinye isikhathi sasizwe kuthiwa untombazana oyedwa uhlangana labafana baze babe bahlanu, kambe nxa singabamba isisu angasikhomba ukuthi ngesikabani.
Ngibuye ngafunda ngenye futhi indaba yomphurofethi ocine edlwengula umama okade efuna imithandazo yokuthi athole inzalo. Kuthiwa umphurofethi lo, watshela inina lelo ukuthi kulento evalileyo esibelethweni salo, kufuna yena afuqe leyonto, ngenxa yokuthi ubesedubekile njalo lemendweni wakhe ehlala ethenjiswa ukuthi uzatshabalala wavuma, uthe efika etshela umkakhe ukuthi kwenzakaleni mamo yawuchitha umuthi inkonyane.
Ngikhuluma kanje usejele lowomphurofethi, inina lelo umendo wahle waphela.
Zinengi izinto ezenziwa ngabantu.
Abaselaye unembeza abantu. UNkulunkulu abasamesabi, ngithemba lawe lapho okhona uyazibona izigigaba lensindabaphenduli ezidalwa ngabantu.
Ayixabene.
