admin
YiNtatheli kaMthunywa
UMQEQETSHI owaziwa ngokutsho akufunayo kunguqu uBongani Mafu kubikwa usefike eHwange wabatshengisa ukuthi izinto ziqhutshwa njani.
Ukufika kwakhe sekukhweze ukuzethemba kubadlali bona abalahla ithemba ngokukhitshwa kunkundla zeligi ephakemeyo iPSL ngesizini ka2019.
UMafu uqhatshwe ngoZibandlela ukuthi aqeqetshe iChipangano ezabe iligiqa kunkundla zikaDivision One kulisizini. Ngokufika kuleliqembu, uMafu kazange aphuze ukubika ukuba ufuna ukuphenduka kuPremier Soccer League ngesiphangiphangi.
Inkokheli zeHwange zimnike umsebenzi mhlawumbe zijabuliswa yimbali yakhe enhle esesekuHighlanders lalapho eqeqetsha ezweni leBotswana.
Loba engazange akucacise ukuthi uzafuna ukuthi angene kuPSL lethimu le, kuyaziwa ukuba uMafu asimqeqetshi omncinyane njalo uthanda ukuthi adlalele enkundleni eziphezulu. Kuliviki, umqeqetshi lo wazise intatheli ukuba kusemasinyane ukuthi achaze inhloso yakhe.
“Kuhle ukuthi siqale ngokuhlonipha wonke amaqembu esizadlala lawo. Ngibona angathi sidlala lawo wonke, sizakhuluma,” kutsho umqeqetshi lo.
Uqhubeke wathi ukuphumelela kuDivision One kuzafuna ukuhlakanipha.
“Kumele sisebenze nzima, sikhaliphe njalo ngoba sidlala lamaqembu aselesikhathi eside ekhankasela ukunqoba iligi.”
Kusalindwe ukuthi kubonakale ukuthi uzaletha baphi abadlali umqeqetshi lo. Kuminyaka edluleyo, iHwange ibikhetha ukuphakamisa abadlali abasakhulayo labanye abangela dumo.
Kwandise ukuthi iChipangano ithenge abadlali abavela kwezinye indawo kodwa kubikwa lokho akuyincedi.
Isinqumo esikhona esivela kubasekeli lenkokheli zethimu yikuthi iChipangano idlalelwe ngabafana abaphuma eHwange kuphela.
Kodwa ngokuhlolisisa umdlalo walithimu kumasizini ambalwa adluleyo, kutholakale ukuthi iHwange ibiqalisa kuhle, yehluleke isizini isiyaphutsha.
Inkinga zeHwange zijwayele ukuhlasela kusigaba sesibili sesizini. Imbali iveza ukuthi iqembu lilahlekelwa yimiklomelo ngalesisikhathi loba iqalise itshisa.
Online Reporter