Online Reporter
KUSUKELA eMandulo abantu babelendlela ezitshiyeneyo zokuzithokozisa lokuchitha isikhathi nxa beziphumulele, abanye babebukela unobhutshuzwayo abanye njalo bengababheja amabhiza, inengi labantu lalingena emabhawa lizithokozise kugidwa lemigido etshiyeneyo.
Abanye abantu bathi banganatha umaphephetha engaphandlwanga basuke baziphathe butshapha. Kulenye indoda engake ngasebenza layo yathi isibudlile kulomdlalo wokujabulela ukuphela komnyaka wezisebenzi wenkampani esasisebenza kuyo, yayihleli ixabana lomunye ufolomani, kwathi ngoba abantu kwakulilanga labo lokujabula njalo kuhlanganwa leziphathamandla zenkampani.
Abantu bezijabulela abanye bengabosa inyama, abanathayo bezinathela, yasukuma lindoda yaqonda kufolomani lo yafika yathi yona ayesabi muntu njalo lomsebenzi kayiwuncengi ngoba ifuyile.
Sathi silokhu sisathithibele ukuthi kambe umuntu angenza into elihlazo khona kulilanga lokujabula, sizama ukumbonisa ukuthi into ayenzayo yayizamfaka emanyaleni ngoba ukulwa kungavunyelwa emsebenzini, yavela yameqela ufolomani yamtshaya ngenhlanekela wayawela le ngesiphundu.
Njengoba umdlalo lowu wawusenzelwa ehoteleni enkulu onogada bahle bamthela izankosi ngesikhatshana basebemhambise emapholiseni afika amvalela bethi bafuna utshwala buqale buphele ekhanda.
Wathi esetshelwa ukuthi izolo wenzeni wakhuza umhlolo etsho elandula, uthe esizwa ukuthi ufolomane ayemtshayile wayelokho engakhulumi esibhedlela lwamtshaya lwamqeda uvalo ecabanga ukuthi angafa umuntu weNkosi kuzahle kuthiwe nguye ombuleleyo, yingakho lesigwebo sizaqansa.
Loba eselabhela kubakhulu benkampani esebhala izincwadi kwathi udaba lwakhe luzabonwa nxa ufolomani esesilile, yakhala indoda endala yaze yaphumisela isithi yayingazenzi yayidakiwe, ngaze ngakhumbula ubabamkhulu wami owayesithi kuxwaya abanathayo ukuthi babobuthela amanzi ukuze kuphunguleke ubukhali.
Banengi abantu abazithola bekulesi isimo besenziwa butshwala, khona ungabuthela kakhulu buyakwenzisa amaphutha ozazisola impilo yakho yonke, abanye bagwetshelwe odilika jele ngemva kokudala amacala bedakiwe, abanye sebabulala abanye njalo sebadlwengula kubangelwa yibo utshwala.
Yikho nje ngisithi ababunathayo baboqaphela bangedlulisi amalawulo ngoba umantshi nxa esekugweba kalandaba lokuthi ubudakiwe.
Ayixabene.
