admin
Mehleli Dube
ZINENGI izinto ezimbi lezinhle ezenziwa yithi thina abantu, ezinhle zakhona zinconywa loba ngubani njalo azikutshayisi ngekhanda.
Ukhona umuntu ongazenza iqhalaqhala enzele abanye abantu ulunya lomona kusole wonke umuntu, yena angakutshayi ndiva ngoba ezenza unogwaja, ongasweli macebo okuphunyuka.
Ngikhumbula enye indoda eyabulala umuntu, wayatholakala esemathambo amhlophe ezinkalweni zezintaba zasematojeni, kwathi loba ubufakazi bukhomba ukuthi ngempela nguye omcuyacuyileyo, yena ngenxa yokuthi ngumuntu owayelezimali zakhe wadinga abameli sibi sababuya emazweni aphetsheya, watholakala engela cala.
Kodwa enhliziyweni yakhe wayekwazi ngempela ukuthi ucobodiswe nguye, wasuka wakhohlwa ukuthi umuntu wenziwe ngomfanekiso kaMdali, kulapho uNkulunkulu azibuka khona njalo usithanda sonke ngokufanayo.
Walaluka walibala ukuthi kulento ebizwa ngolimi lwabondlebe zikhanyilanga okuthiwa yi “natural justice” mihla yonke wayehlala ezithonisisa, ethi elibele kufike engqondweni leliya langa abulala khona umuntu weNkosi, wawungathi kwesinye isikhathi ukhuluma laye ngendabathize uzwe esenhlanhlatha esithi ngicela uxolo ngokubulala ngobuhaga, loba kuyini ongakufuna ngizakubhadala.
Umangale ukuthi kanti usekhuluma ngani, khona ebusuku wayengalali, aze ajuluke lemsisileni, lengubo uthole sezimanzi kungani zithanjiselwe ngokungokhekhe okulele kuphunge inkovu ngoMpandula.
Lomzimba waqala ukuwohloka kwangani ngumuntu ogula isifo sengculazi. Kwamangalisa abanengi ukuthi kambe umuntu waphenduka waba lucingo yena elezimali ezingaka ekhomba ngophakathi, bengazi ukuthi ujaji wamajaji unembeza wakhe semnike isigwebo atshada laso emini lebusuku.
Ayixabene.
Umlobi uthinteka 0714355641.
Online Reporter