admin
Isiko lesintu indodana nxa iphuma ebubhungeni, isijwaqile, ithi nxa isibone intombazana engakha layo umuzi, iyatshayelwa ihlahla eceleni kumbe bucwadlana lomuzi wabazali bakhe kayi kude kangako ukuze akhulise umdeni.
Kweminye imideni uthola behlezi ngokosendo kuze kukhethwe losobhuku khonapho kwazakale ukuthi isigaba esinje abantu bakoZibanyana bahlala endaweni ethize.
Umngane wami uDuduzile wenza inkalakatha yehlazo, wakhetha ukufulathela abosendo lwakhe wayakwakhela ngakibo kankosikazi wakhe. Wawuzwa nxa sebemphoxa abakibo bathi nguThubayi umahamba yedwa njengomduna wendwangu oxotshwa ngamajongosi emhlambini.
Phela wayethubele wayakwakhela empumalanga. Umuzi wakhe wawubizwa ngebizo lekhosikazi lakhe babengatsho ukuthi kukoDlomo, kwakuthiwa kuko MaMoyo.
Wayehanqwe ngabafowabo bakamakoti wakhe behlezi bengumdeni, yena nguye owayeyindlubu ewele ephokweni, wayethi lamhlazana umkakhe emcaphulile nxa ethi udobha uswazi ukuthi ambhaxabule aklabalale noma engakafakwa isandla abafowabo beze begijima bezolamulela udadewabo, ngoba bezwe umkhosi ongani yimvokloklo yembila ethabele izulu lensewula ngoba ikwazi ukuthi izihlahla zizahluma izikholise ngehlaza.
Wawuzwe labomakhelwane bethi lubaba ngabe uyaqunga isibindi akhafule akudliswayo ethathe imitshaqana yakhe ayekwakhela lapho okulabakibo.
Umkakhe laye wayelomlomo uzwe nxa bangahitshana emtshela ukuthi akusikho kibo la, kukwakhe yingakho kukhala esakhe isicathulo.
Emasimini wayesetshenziswa okwenkunzi yembongolo engene esizeni yadla amajodo. Abanye babehleka usulu bethi uthi pho ulegazi lubaba, phela lakubabazala kwakuthi nxa kulomsebenzi kubizwe yena njengomkhwenyana asebenze ajuluke okwecalaha elixotsha imbabala.
Abanye wawuzwa bethi ulungile lubaba ngoba wenza imisebenzi yonke yasekhaya umkakhe ecambalele ecansini lemizi kwesinye isikhathi umthole etshaye amanqetshane okwekhehla eliphuze ithothotho lingadlanga.
Phela kwakuthi noma kungaba lomonakalo onjengemfa wayengabuyi esesaba ukuhlekwa ngabakibo, lalabo akhula wafunda labo.
Laye wayesewaphenduka isithutha ehlala emdambiyana sekungani yisikhukhukazi esilomlenka, enunubele njalonje.
Noma babehleka wayeziduduza ngokuthi kulilungelo lakhe ukuthi ayekwakha lapho afuna khona njalo umthetho welizwe awukwenqabeli lokho.
Nxa ufuna ukuba yindoda emadodeni ungaqali ukuyakwakhela kibo komfazi funa bathi wendile wena uyindoda.
Ayixabene.
Online Reporter