Online Reporter
Zazithi zingavulwa izikolo, ibizo lomngane wami uDingindawo libizwe le lale ngenxa yobungezwa bakhe. Konke esasilaywa ukuba sikwenze ngababalisi yena wayephambana lakho ezenzela umathanda, ethi bayamhlupha.
Wayebona angathi ukhawulisa ababalisi engazi ngoba omunye umbalisi waze waphumisela ukuthi uzakubona okwabonwa yingidi ithwele ilahle ngokuhamba kwempilo.
Wayeludubo ngokwalo umngane wami kubabalisi; wayengazihluphi ngokwenza umsebenzi wesikolo nxa kungela swazi eduze. Sasisithi singaphiwa umsebenzi wangekhaya (home work) wayephenduka lebhuku linjalo engabhalanga lutho. Wayengaceli lokuthi abafowabo bamncedise ezitshela ukuthi ababalisi bayahlupha.
Zonke izinto ezimbi ezazisenzakala esikolo igama likaDingindawo lalingaswelakali, kungaba yikubanga umsindo, ukungenzi imisebenzi yesikolo sibi sokuthelela isivande sesikolo wayengaqali nxa kungela mbalisi othwele uswazi.
Wayethanda ukutshayelwa engani zinkabi ezilimayo ezizwa ngomchilo, wayeseze waphiwa ibizo lokuthi nguSidumuka ngoba ababalisi bethi ukwenza kwakhe kufanana xathu lokwenyamazana yona ehlala ehlathini ephila ngokubaleka isesaba abazingeli.
Ngelinye ilanga wakubona ukuthi ubuhlongandlebe bakhe abumncedi lutho sathi sesiqedile izifundo zezinga le A-level yena wahle wama ku Form 4, wehluleka ngitsho lokuthi aphume lesifundo esisodwa. Kuthe sekuqhatshwa ababeqedile isikolo kumenyezelwe kuthiwe kufuneka abalezifundo ezinje yena ngenxa yokuthi wayengela lutho wadla ngobuqhwaga bakhe wayangena umsebenzi kuhlangothi lwabomgwaqo, kwakumbiwa amatshe ethelwa emgwaqweni kwakubalwa ukuthi usuthwale amabhara amangaki, angaba malutshwane kukhawula wena mnikazi ngoba leholo lizakuba lilutshwane.
Waze wavuma ngekhanda esehawukela thina esasilemisebenzi yemahofisini yena ejuluka izithukuthuku, ngezwa esesithi ngangidlala ngesikolo ngisithi ngikhawulisa ababalisi kanti ngizikhanzinga ngamafutha ami.
Banengi abantwana abazithola besesimeni sikaDingindawo bakhale ezimathonsi sebenanzelele ukuthi badlalise amathuba amahle becabanga ukuthi ukungenzi umsebenzi wesikolo kukhawula umbalisi.
Ayixabene.
