marble nkomo
Nkosilathi Sibanda
ILIZWE libhekane lokwanda komkhuhlane wobhova ikakhulu lo obangelwa yizinja, okwenze ugatsha lweLands, Agriculture, Fisheries, Water and Rural Development lwethule uhlelo okuhlatshwa kwezinja elizweni lonke.
Unobhala walolugatsha, uSikhwicamfundo u-Obert Jiri uqinisekise ukuba kutholakale imithi yokuvikela ubhova efika i-650 000 evela eBotswana. Imithi le yedlula inani elivame ukufunakala ngomnyaka ukulwisana lomkhuhlane lo.
Umkhankaso lo uzasungulwa emavikini azayo kuzo zonke izabelo zelizwe, uqondiswe ikakhulu endaweni eziseduze lamapaki elizwe kunye lendawo zokulondolozwa kwenyamazana lasemadolobheni lapho osekubikwe ngomkhuhlane.
USikhwicamfundo uJiri ugcizelele ngokuqakatheka kokuhlolwa ngempilakahle yalo olunywe yinja masinyane njengoba umkhuhlane wobhova ubulala abantu nxa izibonakaliso seziqalile ukuba khona.
Uphinde wakhuthaza bonke abanikazi bezinja ukuthi baqinisekise ukuthi izinja zabo ziyahlatshwa umuthi wokuvikela, egcizelela ukuthi ukubambisana kulokhu yikho okuvikela kuqala kulumkhuhlane obulalayo.
Online Reporter