admin
Yvonne Chidochashe Manyanja
ROJA rekudzupura gonhi apo rairwisana nemudzimai waro zvikazoita kuti ribhadhariswe mari yekuritsiva rinonzi rave kudya marasha richiti riri kuda kudzoserwa mari yaro nemuridzi wemba. Florence Gono akaendesa Trevor Max kudare reHarare Civil Court achiti ari kumushungurudza nekuda kwe$80 iyo yaakamubhadharisa zvichitevera kudzura kwaakaita gonhi repamba pake apo airwa nemudzimai wake.
“Changamire, mukomana uyu akanga ari roja pamba pangu. Hameno kuti akanga abatwa nemweya rudzii ndokurwa nemukadzi wake zvekuti vakasvika pakudzupura gonhi rangu. Paakaita izvi haana kana kumbofunga kuda kurigadzirisa, akabva abuda mumba mangu achinogara kumwe achisiya mbatya dzemukadzi wake dziri mumba mangu zvekuti handina kukwanisa kuisa mamwe maroja.
“Nyaya iyi takaimhan’ara kumapurisa akabva andipa mari asi akabva aita ruzha achiti aida kuuya kuzopunza mahwindo emba yangu nekuti ndakamumhan’arira.
“Izvi akatouya akazviita ndokupunza mahwindo ose zvawo zvekuti takange tave kutya kuti anogona kutotikuvadza. Akabhadhariswa mahwindo aakapwanya akanditevera kumba kwangu achiti aida mari yake yaakabhadhara yemba asi akanga atombogara mumba mangu saka hameno kuti $100 yaaida yakanga iri yeyi,” akadaro Gono.
Max akaramba zvakataurwa naGono achiti ndiye ane mari yake sezvo akamubhadhara mari yemba yaasina kuzogara uye akamupa mari yekupwanya kwaakaita mahwindo negonhi yose ndokukwana $190.
“Mari yavo yemahwindo neyegonhi ndakavapa mushure mekunge ndaibhadhariswa kumapurisa, yaikwana $190. Saka zvavari kutaura handichazivi pamwe vave kuda kuita mari neni.
“Nyaya iripo ndeyekuti ndakatovapinza mudare ndichida kuti vandibhadhare mari yangu nekuti ndakasiya ndavabhadhara mari yandisina kuzogara,” akadaro.
Mutongi Gamuchirai Siwardi akati nyaya iyi idzoke mudare apo mapurisa anonzi ane ruzivo nezvekubhadharisana kwakaita vaviri ava achange achizopa umboo.
Online Reporter