Scotland youya kuzotamba neZimbabwe A

Abel Ndooka

CHIKWATA checricket cheScotland chichauya munyika muno mwedzi unotevera kuzotamba mitambo mitanhatu yeTwenty20 International Series neyeOne Day International Series nezvikwata zveZimbabwe Academy neZimbabwe A.

Mitambo mitatu yekutanga ichaona Scotland ichisangana neZimbabwe Academy iyo inoti miviri yeTwenty20 International Series nemumwechete weOne Day International Series.

Mitambo yose iyi ichatambirwa kunhandare yeTakashinga Cricket Club.

Ichatambwa mumazuva anoti 19 na22 Kubvumbi uye ichingopera, Scotland ichabva yatanga kubandana neZimbabwe A mumitambo mitatu yeODI iyo yese ichatambirwa kuHarare Sports Club mumazuva anoti 24, 26 na28 Kubvumbi.

Achitaura pamusoro pekuuya kweScotland kuzosangana nezvikwata zvemuno, managing director weZimbabwe Cricket – Givemore Makoni – anoti mutambo uyu uchabatsira zvakanyanya mukusimudzira cricket.

“Mitambo iyi yakakosha sezvo ichawanisa vatambi vedu mukana wekutamba nezvikwata zvepamusoro,” anodaro.

Anoenderera achiti, “Tiri kufara kusangana neScotland nekuti tinovimba kuti mitambo iyi ichabatsira zvikuru pakusimudzwa tarenda revatambi vedu.”