daniel chigunwe
Abel Ndooka
CHIKWATA cheCentenary United chiri kutsidza kuti chicharwa semvumba mumwaka wacho wekutanga chichitambira muNorthern Region Division One kuti chigopinda muCastle Premier Soccer League mugore ra2026.
Mwaka mutsva weNorthern Region Division One uchatanga nemusi wa4 Kubvumbi uye Centenary United chimwe chezvikwata zvitsva zvakapinda muligi iri.
Uyu uchange uri mwaka wayo wekutanga kutamba muNorthern Region Division One kubva pakavambwa chikwata ichi.
Sachigaro weCentenary United – Patrick Banda – anoti shuviro yechikwata chavo kuzotamba nhabvu muPremier League gore rinotevera.
“Sechikwata, tiri kushanda zvakasimba kuti mumwaka wedu wekutanga muNorthern Region tigorwa semvumba nekuti isu kwedu kwatinoshuvira chaiko kuenda kuPremier League (PSL) saka tiri kushanda kuti mwaka uno ugofamba nemazvo.
“Tinoziva kuti handinyore saka tiri kushanda zvakasimba kuita gadziriro dzedu. Tinoziva kuti zvikwata zvakawanda zvichange zvichirwa kuti zvigobudirirawo nekudaro tichatokunya totosunga dzisimbe,” anodaro Banda.
Mumwaka wavo wekutanga muDivision One, Centenary United ichange ichirairidzwa naTonderai Bonde.
Chikwata ichi chakaumbwa nevatambi vari kusimukira, vechidiki kunyanya.
Banda anoti vakaronga kupa mukana kune vechidiki sezvo vari ivo vatambi vemangwana.
“Isu tiri kupa vechidiki mukana nekudaro muchaona kuti mwaka uno chikwata chedu chichange chizere nevatambi vechidiki nevamwe vakura vasina mazita anonyanya kuzivikanwa.
Shuviro yedu kubika vatambi vane hunyanzvi vemangwana uye tinoda kuve himwe chezvikwata chichazenge chichizivikanwa nekubika vatambi vepamusoro,” akadaro Banda.
Online Reporter