Chronicle Editor
NGOLWESIHLANU kuviki ephelileyo, inani labantu abakade sebetholakale belegcikwane leCovid-19 (coronavirus) eZimbabwe beselifike kutshumi lantathu, kwathi abathathu babhubha.
Omunye walabo ababhubileyo likhehla lakoBulawayo elileminyaka engu-79. Ikhehla leli kubikwa libhubhe ngoMgqibelo kuviki ephelileyo kwesinye isibhedlela sakoBulawayo.
Abezempilakahle edolobheni lakoBulawayo sebenelise ukuxhumana labantu abahlangana lomuyi, abangafika amatshumi amane lasikhombisa. Laba bagoqela izisebenzi zesibhedlela lapho okwafela khona umuyi abalitshumi lantathu, kanye labahlali lezisebenzi zeQalisa Retirement Village eSuburbs, lapho obekuhlala khona umufi. Abantu laba basakhangelwa ukuthi bona abalitholanga igcikwane na.
Umuyi lo ubengelambali yokuvakatshela phandle kwelizwe, kodwa waveza ukuthi uke wavakatshela indawo yokwethekelela eHwange mhlaka 14 kusiya ku 16 Mbimbitho. Kumbiko ovela kuHulumende, unobhala omkhulu kugatsha lwezempilakahle lokondliwa kwabantwana uDokotela Agnes Mahomva uthe umuyi wangena esibhedlela ezokwelatshwa kucatshangelwa ukuba angabe ele nyumoniya (pneumonia).
UDkt Mahomva uthe umkhuhlane waqinela umuyi ngelanga elaliswe esibhedlela wasiwa ku cele labagula kakhulu lapho ayekhangelwa khona ehlukaniswe labanye abantu.
“Iqula labakhangela ngeze-Covid-19 labizwa kwathathwa amasampuli ukuze ayehlolwa. Kusalindwe impumela yokuhlolwa kwamasampuli, lo osengumuyi wayephiwa ama-amaphilisi njalo eselatshwa njengomuntu okucatshangelwa ukuba ulegcikwane le-Covid-19. NgoMgqibelo umkhuhlane wala ulokhu umqinela okwabangela ukuba edlule emhlabeni.”
UDokotela Mahomva uthe kusalondwa abantu bonke abake babaseduzane lomuyi njalo ugatsha lwezempilakahle lusebenza ngokuqaphela okukhulu ngalumkhuhlane osewabulala abantu abedlula inkulungwane ezilikhulu (100 000) emhlabeni wonke jikelele kukanti abatholakala belomkhuhlane lo sebedlula isigidi lengxenye (1,5 million) emhlabeni wonke jikelele.
Ukhuthaze izizalwane zakuleli ukuthi zilandele imilayo eziyiphiwayo ngokuhlanzeka ukuze kuvikelwe i- Covid-19.
UHulumende sowethula ukuba abantu bahlale ezindlini okwensuku ezingu-21 ukuze kulawulwe ukuhambahamba kwabantu njengemizamo yokuvikela ukumemetheka kwegcikwane leli. Uhlelo lokuhlala ngekhaya abantu bengayi lasemsebenzini lwaqala mhlaka 30 Mbimbitho. — Yintatheli yoMthunywa leSunday News.
Online Reporter