Online Reporter
Nkosilathi Sibanda
ABASAKHULAYO kuleli kumele basebenzise inkundla zokuxhumana ebulenjini ngendlela efaneleyo, benelise ukujulisisa ingqondo, bathole ulwazi lokuba amathuba azaguqula impilo zabo zibengcono.
Inkuthazo le ivele kusaziwayo ongumculi uMzoe7, obike ukuba kunengi okungaphathisa intsha, ikakhulu abafundi ezikolo, okugcwele kuSocial Media.
UMzoe7, ophinda abengumcebisi kwabasakhulayo, ucela lomphakathi ukuthi uncedise ekuqondiseni abantwana enkundleni zokuxhumana.
“Endaweni yokuthi abantwabethu batshonele ukudlala lokuvula amakhasi angayisiwo kuSocial Media, kumele bazame ukusebenzisa lezi inkundla ukudinga ulwazi. Nxa bengasebenzisa iSocial
Media ngendlela engayisiyo, izabalimaza, kodwa bengayithatha ngendlela efaneleyo, bathole inzuzo,” kutsho uMzoe7.
“Ngokubona kwami, intsha yakulezinsuku ibusiswe kakhulu ngokukhula ngesikhathi sodumo lweSocial Media. Inkundla lezi zingumthombo wolwazi olulakho ukuphakamisa impilo. Siphila esikhathini lapho i-technology lokwabiwa kolwazi okuhamba ngesiqubu esikhulu.
Ngenxa yalokho, abasakhulayo sebebhekana lezinto ezinengi kakhulu enkundleni zokuxhumana. Ngibacela ukuthi basebenzise inkundla lezi ngendlela eqondileyo, njengokwenza ucwaningo, ukuzithuthukisa ulwazi lokuxhumana okuhle.”
Uthe uyaziqhenya ngokuba ngumcebisi lomqeqetshi wabanye abasakhulayo kuleli, esithi yibo abazakuba ngabakhokheli bakusasa.
“Ngiyazithoba njalo ngiyaziqhenya ngokweluleka abanye abasakhulayo eZimbabwe ngoba yibo abakhokheli bakusasa emphakathini yethu kanye lelizweni jikelele. Umuntu osakhulayo ololwazi, ogxile kulokho akwenzayo njalo ofundileyo uzakwakha ikusasa elihle,” nguMzoe7 lo.
Kusenjalo, uMzoe7 ubike ukuba uzaqhubekela phambili ngenhlelo zakhe zokuqeqetsha lokweluleka abasakhulayo ikakhulu.
“Ngizabhoda emalokitshini, ezikolo, emabandleni okholo lazo zonke indawo ngitshumayela ivangeli lokuphila kuhle kwabasakhulayo. Umuntu ngumuntu ngabantu njalo okuncweba indlebe ngowakho. Yikho esifuna ukufundisa abantwabethu.”
Umkhankaso wakhe usumakhele ibizo nanko usenxuswa kumibuthano etshiyeneyo ngoba inhlanganiso lezinye ingatsha zikubona ukuthi wenza umsebenzi omuhle kwabasakhulayo.
Ngeviki edluleyo uMzoe7 ubeqhunsa umculo wakhe emcimbini weWinter Concert owenzelwe eFellowship City Church lapho aqhubeke ngemfundiso yakhe yeSocial Media. Kulumcimbi bekulabanye osaziwayo abagoqela uMinister Mpume, Tojey Blox loEsther Grace.
