Online Reporter
Ethel Ncube
INHLANGANISO yeAgritex ebona ngezokulima ikhuthaza abantu ukuba baqalise ukugebha amagodi kagatshompo ukuze bangatshiywa yisikhathi.
Abalimi abangakaqalisi ukugebha amagodi bakhuthazwa ukuba baqale ukugebha amagodi izulu lingakafiki ngoba kungumsebenzi okumele uqaliswe ngenyanga kaMfumfu.
UMnumzana Thembelani Ndlovu ongu-Agritex Officer ubike ukuba isikhathi sokugebha amagodi okuhlanyela sesiqalile.
“Njengoba sesiphakathi kwenyanga kaMfumfu sesiphakathi kokugebha amagodi kagatshompo ukuze izulu nxa lisina sivele sesigebhile amagodi ethu.
“Amagodi lawa sikhangelele ukuthi ehlukaniswe nge-75cm kuthi phakathi kwemifolo abe kumele ehlukane nge-60cm,” kuchasisa uMnu Ndlovu.
“Ekugebheni lapha inani lamagodi akho liya ngokuthi ulima imigelo emingaki. Imigelo yakho kumele ibe yi-39m ubude kuthi ububanzi bube yi-16m, kumele ugebhe amagodi angu-1 456,” kutsho uMnu Ndlovu.
Ubuye waveza ukuba nxa sugebhile amagodi lapha kumele ufake umvundiso njalo kumele ubekwazi isilinganiso esifakwa kugodi linye ngalinye.
“Nxa usugebhile amagodi akho waqeda isilinganiso somquba osifakayo ligabha lejamu. Kugodi linye ngalinye kukhangelelwe ukuthi ufake igabha lejamu elilodwa lomqhuba egodini.
“ Kuthi ke imvundiso ethengwayo uyafaka uCompound D isivalo esenamunede ye-Pepsi esisodwa.
“Esikutshoyo yikuthi nxa sucupha umvundiso wakho ucupha isivalo esisodwa uthele egodini linye ngalinye,” kuchasisa uMnu Ndlovu.
“Abalimi abangakaqalisi ukugebha amagodi qalani khathesi isikhathi sesihambile esokugebha amagodi lihle lilungiselele kuselesikhathi,” kuphetha uMnu Ndlovu.
