Online Reporter
Brandon Moyo
ASESONDELE amalanga okuqala umncintiswano wamazwe owe-ICC Men’s Under-19 Cricket World Cup, nanko inkezo le isibhodiswa emadolobheni azaphatha imidlalo le kuleli.
Inkezo le ibhodiswe koBulawayo ngoLwesibili, lapho efikiswe khona enzikini yedolobho, yedluliswa phambi kwesithombe sikaJoshua Nkomo, qede lapho kwangenwa indlela eziqonda emalokitshini.
Uhambo lolu beluhloswe ukukhankasa mayelana lomqhudelwano wenkezo yomhlaba ozayo, ozaphathwa yiZimbabwe kunye leNamibia kusukela mhlaka 15 Zibandlela kuze kube mhlaka 6 Nhlolanja.
Inkezo ihanjiswe endaweni ezitshiyeneyo edolobheni, lapho eyamukelwe ngenjabulo ngabalandeli bekhilikithi kanye lomphakathi jikelele.
Abathandi bekhilikithi eZimbabwe bazathokoziswa kakhulu ngoba ilizwe lizaphatha inani elikhulu lemidlalo enkundleni ezintathu ezigoqela iQueens Sports Club koBulawayo, iHarare Sports Club leTakashinga Sports Club eHarare.
Kuza kuba lemidlalo engu-41 (kungabalwa eyokuzilolonga), kuthi engu-25 yayo idlalelwe eZimbabwe.
Uhambo lokubhodisa inkezo luqale eQueens Sports Club, lapho inkezo ehanjiswe khona eZonkizizwe
Shopping Centre eBradfield, yaya kusithombe sikaJoshua Mqabuko Nkomo enzikini yedolobho. Kusukela lapho, yadluliswa emgwaqweni ka-6th Avenue yaqonda kuLuveve Road, yaze yafika eMakhandeni Cricket Club lapho abadlali beTuskers abasacathula, abakade bezilolonga abathole ithuba lokuyibona lokuthatha imfanekiso lenkezo enkulu kakhulu emidlalweni yekhilikithi yabasakhulayo.
Ngemva kokubikiswa eMakhandeni Cricket Club, inkezo ihanjiswe koSokusile Shopping Centre eNkulumane, lapho eyamukelwe njalo ngenjabulo ngabantu abadala labancane.
Kumango wokuphenduka enzinkini yedolobho, inkezo le imiswe koPick n Pay Hyper, andubana ibuyiselwe eQueens Sports Club.
Ekhuluma ngomkhankaso lo, umphathi wezokumaketha ku-ICC Under-19 Men’s Cricket World Cup 2026, uTinotenda Mawoyo, uthe uhambo beluqakathekile ekwaziseni umphakathi kunye lokukhuthaza abantu ukuthi baze ngobunengi kulumqhudelwano wenkezo yomhlaba.
“Sihambe emigwaqweni yakoBulawayo, sitshengisa abalandeli kanye lomphakathi inkezo, sibazisa ngeUnder-19 Cricket World Cup eqala ngoZibandlela, inkundla, imidlalo lamaqembu azadlala.
Siyathokoza kakhulu ngesikwenzileyo.
“Kubalulekile ukuthi abantu bakwazi okwenzakalayo kuselesikhathi. Sizabona ithalenta lakusasa, ngakho sifuna abantu basekele ngobunengi. Sithokoza kakhulu ngokuthi iZimbabwe izaphatha imidlalo le, ngakho sibiza bonke abantu ukuthi beze enkundleni bazosekela iZimbabwe kunye lekusasa lekhilikithi emhlabeni wonke,” kutsho uMawoyo.
Wengeze ngokuthi umqhudelwano womhlaba lo lithuba lokutshengisa ubuhle belizwe.
“Leli njalo lithuba lokutshengisa ilizwe lethu. Bonke abadlali bazathola ithuba lokuya eMasvingo, koBulawayo, eHarare lakwezinye indawo. Ngakho kumele sibatshengise, sibafundise amasiko ethu, ukudla kweZimbabwe lobuntu bethu.”
Amaqembu angu-16 azancintisana emidlalweni engu-41.
Ngelanga lokuvula umncintiswano, i-India izadlala le-USA, iZimbabwe ibhekane leScotland, kuthi iTanzania idlale leWest Indies. Iqembu leTanzania liyachinsa ukufinyelela kumncintiswano omkhulu njengalo. Leli lizwe lisacathula kukhilikithi.
Umgcinisihlalo weLocal Organising Committee (LOC), uVumi Moyo, laye ukhuthaze abalandeli ukuthi beze ngobunengi bezokholisa umdlalo omuhle.
“Sifuna ukwazisa abantu bakoBulawayo ukuthi i-Under-19 World Cup iyeza. Silindele ukuthi abantu beze ngobunengi. I-Under-19 iyinkundla yakuqala yokuba ngumdlali omkhulu, ngakho kulamathalenta amahle esilindele ukuwabona,” kutsho uMoyo.
“Njengoba ukubukela imidlalo kuyimahhala, i-ICC ifuna ukusondeza umdlalo ebantwini, ngakho sibiza wonke umuntu ukuthi azebukela, ajabulele ikhilikithi enhle.”
