Online Reporter
Nkosilathi Sibanda
INDLELA ziqonda njalo eMhlahlandlela, eMatobo esabelweni seMatabeleland South emkhosini wokukhumbula iNkosi uMzilikazi kaMatshobana kusekela ngoLwesihlanu kusiya ngoMgqibelo kuliviki.
UMzilikazi, waba yinkosi yokuqala njalo ngumsunguli wesizwe samaNdebele, wakhothama mhlaka 5 Mpandula 1868.
Umkhosi walonyaka uhlelwe ukuthi uqhutshwe okwensuku ezimbili, lapho mhlaka 4 Mpandula okuzanikezwa abantwana besikolo ithuba lokufunda ngembali lamasiko.
Umbuthano omkhulu uzakuba mhlaka 5 Mpandula.
Esethula ngamalungiselelo omgubho kuphephandaba likazulu ngoMvulo, omunye wamalunga eMthwakazi kaMzililazi Cultural Associatiom uMnumzana George Bigboy Sibanda uthe uhlelo lwezikolo luhlose ukuqinisekisa ukuthi imbali kaMzilikazi kayikhohlakali.
“Abantwana bazafunda ngembali lamasiko kaMzilikazi ukuze bakwazi ukukudlulisela kuzizukulwane ezizayo,” kutsho uSibanda.
“Lolu luzakuba lusuku lokufunda lapho abantwana abazafunda ngamasiko amaVenda, abeSotho, amaKalanga, amaTonga lamanye amasiko.”
USibanda uthe abantwana bazathola ithuba lokufunda ngamasiko ezizwe ezitshiyeneyo, okugoqela ukudla kwesiNtu, imigido lendlela yokuphila
Uthe kuzafika izethekeli lamaqembu amasiko akuleli, South Africa, Tanzania, Malawi lakwezinye indawo.
Umkhosi kamhlaka 5 Mpandula kubikwa uzakuba ngowomuntu wonke ofisa ukuzihlanganisa labanye ekukhumbuleni iNkosi uMzilikazi.
Inhlanganiso yeMthwakazi kaMzililazi Cultural Associatiom ithe sekugejwe isibholane eMhlahlandlela ukuze kube lamanzi eneleyo.
Kusenjalo, kukhanya kuzabancane indawo ngoMgqibelo nanko umculi kaMaskandi odumileyo weSouth Africa, uKhuzani, owaziwa ngelithi “Idlamlenze”, lomlingisi uDawn Thandeka King, owaziwa kakhulu ngelikaMaNgcobo, bakhangelelwe ukubakhona.
