Online Reporter
YiNtatheli kaMthunywa
IBHANGA leReserve Bank of Zimbabwe (RBZ) selibike ukuba uzulu uzaqala ukuthola amali entsha, iZimbabwe Gold (ZiG) kusukela ngoLwesibili (7 Mabasa).
Kuzaqala ukwethulwa izilinganiso zalimali eziphansi ezigoqela iZiG10, ZiG20 leZiG50, kuthi ngokuya kwesikhathi kuzakwethulwa iZiG100 leZiG200.
I-RBZ ithe imali entsha le iza ngendlela ezithuthukisiweyo zokuvikela ubuqili, iqinile njalo ilungiswe ngokuhambelana lamazinga atholakala kwamanye amazwe. Lokhu kukhangelelwe ukukhulisa ukwethenjwa kwemali yakuleli.
UGavuna weRBZ uDokotela John Mushayavanhu uthe:
“Silokuthaba ukwazisa umphakathi ngokwethulwa kwemali yamaBig5 ZiG, azaqala ukusebenza kumkhonomi wethu ngoLwesibili,” kutsho Dkt Mushayavanhu.
“Ukukhitshwa lokusetshenziswa kwemali entsha yeZiG kwandulelwa ngumkhankaso ophumelele kakhulu wokufundisa lokwazisa uzulu elizweni lonke, owenziwa yiReserve Bank of Zimbabwe kusukela mhlaka 1 kusiya ku-31 Mabasa 2026, lapho izisebenzi zebhanga ezikade zichasisa kabanzi uhlelo lokukhitshwa kwemali le.”
Lanxa sekukhitshwa amaphepha emali amatsha, iRBZ ibike ukuba amaZiG amadala azaqhubeka esetshenziswa.
“Amabandla amakhulu eZiG100 leZiG200 azethulwa kancane kancane, kugxile ekusetshenzisweni kwemali lesimo somnotho welizwe,” kutsho ibhanga elikhulu lelizwe.
