Online Reporter
Brandon Moyo
ABADLALI be-golf kuleli baphatheke ngokulungiselela umncintiswano we-All Africa Golf Championships, ozadlalelwa eResidence Golf Course, eTunisia ngempelaviki.
Ulindwe ngabomvu lumncintiswano ophathwa njenge-qualifier yokuyadlala kuToyota Junior Golf World Cup. Lapho, yikho okuzaqunywa njalo abadlali abakuyancintisa eJapan ngoNhlangula.
Iqembu labadlali bakuleli ligoqela uMiriam Masiya, Zarina Makwarimba loLily Ascott. Bobathathu bakhokhelwa ngumongameli weZimbabwe Ladies Golf Union u-Olivia Nyamwanza.
Iqembu labesilisa liloTanaka Chatora, Tawana Mangoma, Brydon Amm loTom Sinclair. Likhokhelwa nguPatrick Mangwiro.
Abadlali laba bazangena enkundleni ngoLwesine, besiyacina ngoMgqibelo.
Ekhuluma leZimpapers Sports Hub, uNyamwanza uthe abadlali bakuleli bebephatheke ngamalungiselelo kunyanga ezedluleyo. Uthe ulethemba elikhulu lokuthi bazanqoba kulumdlalo.
“Iqembu lethu belilolonga likhangelwe ngumqeqetshi uSimon Murungweni, encediswa nguJessie Nyakatawa kunyanga ezintathu ezedluleyo. Sibasekele kakhulu ukwenzela ukuthi babe lokuzethemba, baphakamise ifulegi yelizwe.
“Abesifazane bazimisele njalo babonakele ukuthi bahlose ukunqoba ngesikhathi belolonga. Lakuqembu labafana kunjalo, idlabuzane likhona.
“Amankazana ethu ebedlala kumincintiswano yeWorld Amateur Ranking,” kutsho uNyamwanza.
Amazwe azancintisa yiSouth Africa, Zimbabwe, Kenya, Nigeria, Namibia, Uganda, Mauritius, Algeria, Egypt, Zambia, Botswana, Tanzania leTunisia.
Peter Tanyanyiwa