Online Reporter
Nkosilathi Sibanda
UMCULI odumileyo kuleli, oseyintandokazi yabanengi, uMzoe 7, ubika ukuba uzimisele ukuthi athole umaqondana wakhe, ahlale phansi, akhe umuzi.
Kungxoxo abelayo lephephandaba likazulu ngoLwesithathu emini, uMzoe 7 uveze konke okusenhliziyweni yakhe, wathi usediniwe ngomjolo, ngakho lonyaka uzamangalisa abantu ngokuthatha lo osethinte umoya wakhe ngothando.
Umculi lo uthe abalandeli bomculo wakhe lalabo abalandela impilo yakhe kabalinde iValentine’s Day, okuyilapho abazakwazi ukuthi uhloseni kwezothando.
NgeValentine’s Day, uthe yikho lapho azakhipha njalo enye ingoma ethi: Tell, ezachaza kabanzi ngohambo lwakhe kwezothando njengoba eselungiselela ukuthatha.
Uthe ingoma le iphinda ibeyinkuthazo kulabo abasalinde ukuthola umaqondana.
“Umbiko engilawo yikuthi sengizimisele ukuthatha, ngitshade, ngigcwalise umuzi,” kutsho uMzoe 7.
“Ngizakhipha ingoma yami entsha ebizwa ngokuthi, Tell. Ingoma le imayelana lokukhuthaza intsha ukuba yakhe imizi njengoba lami ngisithi sengizimisele ukuthatha ngihlale phansi. Ingoma le ilombiko wokuthi ijaha licela intombi yalo ukuthi laziwe kwabakibo lokuthi lizimisele ukuyithatha lokuthi inhliziyo yalo kayisahlalisekanga.”
UMzoe 7 uthe ingoma yakhe yaphekwa nguDagger Beats njalo ividiyo yathwebulwa yiKeaitse Films. Umculi lo usedume njalo ngokuba lenkampani yempahla zomswenko eye #GagaGugu Wear.
Kulezinsuku kuyavela ukuthi uMzoe 7 ulethalenta kwezokufaka isitayila kumpahla ayithengisayo. Lokhu kuyabonakala ngosekelo aluthola ebantwini abathengayo lalabo abamhalaliselayo enkundleni zokuxhumana ebulenjini.
Bambalwa abaculi kumbe labo abasebenza ukuthokozisa uzulu abalesikhathi lesiphiwo sokwenza eminye imisebenzi eceleni. KuMzoe 7, kwabayinto eyavela njengobizo ukuthi asungule ibhizimusi lokuthunga lokuthengisa impahla yokugqoka.
UMzoe 7 utshele iphephandaba likazulu ukuthi ibhizimusi lomswenko wazalwa elifumbethe.
“Sengiqale njalo ukwenza ezinye ezilomfanekiso wami lamakepesi akulezinsuku ama 5-panel. Luhlelo lomswenko olutsha, oluthole ukugquqguzelwa yimpilo yasemalokitshini. Amakepesi bawathanda kakhulukazi emakasi ngoba abuya eyimbala yonke njalo ayisitshengiselo salokho okuthandwa ngabantu.
UMzoe 7 uthe usebenzisa amandla eSocial Media lezinye inkundla zomculo axhumana khona labantu ukuthi ayethule ibhizimusi lakhe.
