admin
KUDABA oluhlasimulisa umzimba kubikwa kulomntwana okuGiredi 7 obotshwe ngamapholisa kulandela ukubulala omunye, njalo umntwana oleminyaka yokuzalwa engu-4 obesenza izifundo ze-ECD (Early Childhood Development) esikolo esifanayo.
Linkemenkeme etshiye abantu bekhakhamele yenzakale ngoLwesithathu ngeviki ephelileyo eZaka esabelweni seMasvingo. Lo okucatshangelwa ukuthi nguye obuleleyo ngeke simchaze ngebizo ngenxa yeminyaka yakhe yokuzalwa, nanko phela usesemncane. Laba ababili kubikwa bebefunda esikolo seGoko Primary School.
Ngokutsho kwamapholisa, isehlakalo lesi senzakale ngemva kokuba umsolwa okubikwa uleminyaka engu-14 yokuzalwa ebe lokungezwani lomunye njalo umntwana oku Giredi 7.
Kubikwa abantwana laba bacina betshayana ngezibhakela okwabangela ukuthi umsolwa adobhe ilitshe alijike ngamandla ejonge ukutshaya lo ayesilwa laye, kodwa ngokuswelakala kwenhlanhla ilitshe lakhutha lo ayesilwa laye layatshaya lo osengumuyi owayeduzane lalapho okwakulwiwa khona.
Kubikwa umntwana lo oku-ECD wahle wawela phansi wedlula emhlabeni. Ababalisi babikela amapholisa, umsolwa wathathwa ngamapholisa andubana akhululwe ukuze abuyele ngekhaya labazali bakhe. —Ubulembu
Online Reporter