marble nkomo
Lovemore Dube
IQEMBU leHighlanders selilindele ukuqalisa kwemidlalo yeCastle Lager Premiership njalo umqeqetshi wayo uBenjani Mwaruwari ubike ukuba abadlali bakhe bazimisele ukwenza ngcono kulisizini.
UMwaruwari uzabe eqala umsebenzi wakhe ngeSonto eBarbourfields Stadium kumdlalo leBulawayo Chiefs.
Umqeqetshi uzabe encediswa nguMkhokheli Dube loBekithemba Ndlovu.
Abanye abasebhentshini labaqeqetshi nguMalvern Moyo ololonga onozinti loMajaha Ndlovu oncedisa abadlali ukuqinisa umzimba. UZenzo Moyo usengumaneja wethimu.
Kumalungiselelo esizini entsha, iHighlanders ivakatshele eBotswana okwamalanga ayisithupha lapho efike yadlala lamaqembu akulelo.
UMwaruwari uthe uyasuthiseka ngokulolonga abakwenzileyo.
“Ngokubona kwami angila sikhalazo. Sisebenze nzima ukuze sifinyelele esigabeni engingathi sesikulungele ukuncintisa. Sizasebenza labadlali esilabo sithembe imiphumela engcono,” kutsho umqeqetshi lo owayengumgadli weManchester City FC.
Uthe ujabuliswa kakhulu yindlela abadlali abaziphathe ngayo enkambeni.
“Batshengise ukuthi bafuna ukuba yingxenye yeHighlanders. Bakhe ubudlelwano obuqinileyo lapha, okuyinto ebiyisiqakathekisa kumalungiselelo ethu.”
Mayelana lomdlalo wabo leBulawayo Chiefs, uMwaruwari uthe: “Ama-derby ayazikhuthaza wodwa. Impumela yawo iqakathekile. Sithemba inhlanhla izakuba ngakithi njengomvuzo womsebenzi esiwenzileyo.”
Uveze ukuthi bahambe labadlali abangu-32 eBotswana, kuthi abangu-25 kube yibo abazahlala eqenjini sekuqalise iligi yeCastle Lager.
UMwaruwari ubuyela eBarbourfields ekhuthazekile ngemva kokunqoba iDynamos nge-1-0 kumaviki adluleyo kunkezo yeJairos Jiri.
Online Reporter