Online Reporter
Patrick Chitumba
KUKHITSHWE izidumbu zezimbamgodi eziyisikhombisa ezavalelwa lizulu emgodini ngoLwesibili kuviki ephelileyo eSilobela, esabelweni seMidlands.
Kubikwa umgodi lo, owe-Auriga 47 Lot 7 eyaziwa ngokuthi yiKomasiso, eSilobela wacina udilikela phakathi, kubangelwa yikuna kwezulu elikhulu okwamahola amahlanu okuyikho okwadala ukuba umgodi udilikele phakathi.
Imizamo yokubakhipha yenziwa kodwa kwehlula ngenxa yobunengi bamanzi la.
Kubikwa abemigodi eseduzane kunye lezakhamizi bazama okwamahola angu-48 ukuthi basize izimbamgodi lezi.
UKwekwe District Development Co-ordinator uMnumzana Fortune Mpungu uqinisekise ukuthi izimbamgodi lezi zife abosizo oluphuthumayo bengekafiki kibo.
“Ngiqinisekisa ukuthi kufe izimbamgodi eziyisikhombisa kulandela ukudilika komgodi akade begebha kuwo kubangelwa yizikhukhula zamanzi. Ithimba labahlengi lisebenze gadalala laphumelela kusukela mhlaka 6 Lwezi kusiya ngoLwesihlanu ngo 8PM, kwatholokala izidumbu eziyisikhombisa zezimbamgodi,” kutsho yena.
Izihlobo zezimbamgodi kazikabikelwa zonke.
Uthe uHulumende uzancedisa ekubekweni kwezimbamgodi lezi.
“UHulumende okhokhelwa nguMongameli uMnangagwa useveze ukuba izimuli ezilahlekelweyo zizathola ukuncediswa ngamabhokisi, izimota zokuhamba kuyiwa lapho abazabekwa khona kunye lokudla kwalabo abazabe besezililweni,” kutsho uMnu Mpungu.
Ubuye waveza ukuthi omele isigaba seSilobela ephalamende uKhomuredi Jona Nyevera uhambise amatende kunye le-US$1 000 yokusekela izimbamgodi ezangena phakathi komgodi ukuze ziyezama ukukhipha izidumbu lezi.
“UKhmrd Nyevera ubuye wanika imuli inye ngayinye iUS$200. Sithole njalo usizo oluvela kuBravo olomgodi, kuMrs Thokozile Moyo omele ama-small scale mines, amapholisa kunye lebutho. Sithanda ukubonga ngosekelo lolu.
Uxwayise izimbamgodi ukuthi zizame ukwenqabela ukungena phakathi kwemigodi ngesikhathi sezulu ukuze kuvikelwe izingozi ezifana lalezi.
UMnu Mpungu uphinde walimukisa izakhamizi jikelele ukuba zihlale ziqaphele ngesikhathi sezulu.
“Sixwayisa abantwana besikolo ukuthi bangachaphi imfula egcweleyo kumbe ukubhukutsha emachibini. Abantu kumele benqabele ukuhamba nxa izulu lisina kakhulu, kuthi abatshayeli kabaqaphele emgwaqweni, kukanti izikolo kumele zibone ukuba izakhiwo zazo ziqinile ikakhulu uphahla ukuze nxa kungaba lomoya omkhulu lungaphakanyiswa. Konke lokhu kuyancedisa ekwehliseni izingozi zokulimala lokufa ngesikhathi sezulu,” kutsho yena.
UKhomuredi Nyevera uthe kwehle iyezi elimnyama ngoLwesihlanu esigabeni sabo kutholakala izidumbu zezimbamgodi eziyisikhombisa ezangena zisiyagebha igolide. Ngokusweleka kwenhlanhla umgodi wadilika.
