marble nkomo
Nkosilathi Sibanda loFungai Muderere
AMALUNGA uqobo eqembu leHighlanders azakuthi gwaqa enkundleni yeClub House ngeSonto, injongo ingeyokuzwa imibiko mayelana lesimo seqembu, njengoba kuqala umnyaka lesizini entsha.
Kodwa, kukho konke okuzethulwa kulumhlangano, isihloko esizavusa amehlo ngesesikhwama semali yeqembu lokuthi nyakenye imali yasetshenziswa njani.
Okwenza udaba lwemali lubesegudwini, yikuthi kulemibuzo eminengi ngendlela iBosso ephatha ngayo imali, ikakhulu ekwehlulekeni ukubhadala izikwelede.
Umbiko ozakuba mqoka mhla welanga lomhlangano ngokamgcinisikhwama uNkani Khoza.
UKhoza ngomnyaka odluleyo wabika ukuba abahlaziya ingwalo zemali yeqembu kabasuthiseki ngesiphatho sendleko. Lakanye kuzamele ayiphinde indaba le kuzwakale ukuthi yini esilungisiwe kusukela ekuqaleni kwesizini ka2025 kuze kufike khathesi.
UKhoza ukhangelelwe ukuthi ayibeke ebandleni eyezikwelede ezikhona kuma-signing on fees ka-Agent Sawu, Try Ncube, lowaye ngumqeqetshi omkhulu uPieter De Jongh. Bobathathu laba basuswa esikhundleni bengabhadalwanga imfanelo zabo.
USawu, obengumsekeli kamqeqetshi owesibili, usehambise iqembu kumagqwetha, ecela ukuthi anikezwe imali yakhe efika phose US$6 000. USawu wakhitshwa emsebenzini ngesikhathi ikhontileka yakhe kumele iphele ngoMpalakazi 2026.
Loba isikhulumi seqembu uDenzil Mnkandla wabikela iZimpapers Sports Hub ukuthi sebezaqeda isikwelede sikaNcube, benelisa ukubhadala uKelvin Kaindu.
Iphephandaba likazulu lizwe ukuba iHighlanders ingabe ilesikwelede esingafika US$500 000.
UMnkandla kuliviki, uthe ngeke atsho okunengi ngalokhu njengoba uKhoza ezakwethula umbiko wakhe ngeSonto.
“Silelunga lekhomithi ye-executive elisebenza lama-auditor ukuqedisisa isimo se akhawunti yeqembu. Umbono wami yikuthi asilindeni ukwethulwa kombiko lo,” kutsho uMnkandla.
Kuzwakale njalo ukuthi isikwelede sikaKaindu, iUS$11 000 sabhadalwa ngoMfumfu nyakenye.
UDe Jongh ngakolunye uhlangothi usecebele iqembu kuFifa Legal Portal, ebika ukuba ufuna imali yakhe.
Umqeqetshi lo uthe ufuna ukubhadalwa iholo lakhe ndawonye lendleko zokwelatshwa esibhedlela egoqela ukukhitshwa izinyo eseKenya.
Ubike njalo ukuthi usebhale incwadi ebikela iHighlanders ukuthi imnikeze imali yakhe.
IHighlanders ike yaba senkingeni lomqeqetshi uBaltermar Brito okwadala ukuthi iFifa ibeke izijeziso nxa ingabhadali isikwelede se-US$26 000. Imali le yabhadalwa ngusomabhizimusi uWicknell Chivayo.
Online Reporter