Online Reporter
Nkosilathi Sibanda
UMQEQETSHI weHighlanders uKelvin Kaindu kakufihli okukhathaza iqembu lakhe.
Ubika mgceke ukuthi kumidlalo edluleyo imvimbi zakhe kunye labonozinti “bebevuzisa” benika amanye amaqembu amabhola lula.
“Okusiphambanisayo yindlela esihlohlwa ngayo. Kumele sikulungise lokho ngoba ngeke sihlale sinika amathimu amabhola amahala ngalindlela,” nguKaindi lo ekhuluma ngemva komdlalo wabo leTeOne, enkundleni ye-Ascot ngoMgqibelo edluleyo.
IHighlanders ingene umango okwesibili kulisizini. Bayiqalele ukuhlohla, lapho umdlali weTelOne uMilton Chimedza elingenise egedini kulandela iphutha elenziwe ngunozinti weBosso uReward Muza.
Ngenhlanhla, abadlali beHighlanders bavuke khwatshu, balithatha ibhola, balikhabelana beliqhuba phambili, kwathi ngemva kwemizuzu eyisikhombisa, uReason Sibanda wahlohla umvema webhola elisukumise abalandeli. Kwaba yikuqala phansi, kwathula ezeTelOne.
Kulokho, uKaindu uthe kubengcono ngoba baphume lomklomelo.
“Lo bekungumdlalo wethu wesibili sisemangweni. Sithole umklomelo, okuhle kuyikuthi siyahlohla amabhola. Sidlale kuhle kusigaba sesibili somdlalo, bekumele sihlohle amanengi,” nguKaindu lo.
Umqeqetshi weTelOne, uHerbert Maruwa uthe: “Ukudlala leHighlanders akulula. Okungithabisayo yikuthi kasikanqotshwa enkundleni yethu.”
Ngemva kwemidlalo eyisitshiya galombili kuligi yeCastle Lager Premiership, iHighlanders ikunombolo yesikhombisa, ilemiklomelo engu-11.
Iqembu leTelOne likunombolo yesihlanu, iphethe imiklomelo engu-12
