Online Reporter
Nkosilathi Sibanda
NXA abantu bengaba phakathi kwenkinga ezidalwe yingozi lezehlakalo thize, bakhuthazwa ukuthi baxhumane logatsha lwe-Insurance Council of Zimbabwe (ICZ) ukuze bathole usizo masinyane.
Ugatsha lwe-ICZ luthumele umbiko lusazisa umphakathi ukuthi abantu bakhululekile ukutshayela ucingo kunombolo ezithi 591 mahala. Ithe izikhalazo lezo kumele ziphathelane lomshuwalensi.
“Inkundla yethu yokuxhumana lozulu izaphathisa kakhulu kunkinga ezigoqela ingozi zomgwaqo, ukuhlanganisa lokuncedisa ekutholeni usizo lwama-ambulance, iCivil Protection Unit, fire brigade lokunye,” kutsho umbiko lo.
I-ICZ ithe izaphathisa njalo labo abawelwe yingozi emgwaqweni ukuthi bathole usizo lwe-insurance. I-Call Centre yalinhlanganiso iphinda iphathise ngokwabela ulwazi, ukubeka lokuxazululwa kwezikhalazo.
Ekhuluma lentatheli yephephandaba likazulu, omunye wezisebenzi ze-ICZ, uRingisai David uthe uhlelo lolu lusekelwa ngamankampani agxile kweze-insurance elizweni.
“Sethula uhlelo olutsha lokubika lokuthola usizo lwe-insurance silugatsha lwe-Insurance Council of Zimbabwe. Abantu kabakhululeke batshaye ucingo ku-591, besebenzisa loba yiwaphi amagagasi okuxhumana akhona kuleli.”
Uthe ukuthola usizo lwe-insurance kuzaphathisa labo abavele belenhlelo zabo ze-insurance, ukwenzela ukuthi bayithole masinyane nxa behlelwe yingozi.
