admin
MUMIRIRI weBuhera South mudare reNational Assembly, Cde Joseph Chinotimba, vanoti vatungamiriri vematunhu vanofanira kushanda nesimba munyaya dzebudiriro nekuti ndicho chikonzero chikuru chavakasarudzirwa.
Vanoti donzvo ravo guru nderekusimudzira zvido zvevagari veBuhera South avo vakavimba navo nekuvavhotera. Cde Chinotimba vanoti vari kushanda nesimba kuti migwagwa yemudunhu ravo, yakaita seunobatanidza Murambinda neBirchenough, igare yakanaka.
“Ini saCde Chinos (rivova zita remadunhurirwa) mbiri yandiinayo inobva muvanhu vakandisarudza kuti ndivamirire. Saka handizofa ndakazorora kuvaitira mabasa ebudiriro kusvika zvanaka nekuti simba rangu riri muvanhu sehove iri mumvura. Mugwagwa weMurambinda-Birchenough ndakatsidza kuti uchagara uchigadzirwa nemimwe yose midiki,” vakadaro.
Vanoti vane rimwe giredha ravakapihwa neZinara iro vanotsvagira mafuta edhiziri kuti rishande richigadzira mugwagwa mukuru uyu nemimwe midiki inoenda kuzvikoro nekumataundishipi akasiyana.
“Kune vanoda kurwisana neni kuti vanditadzise kuita mabasa ebudiriro ndinovayambira kuti vazorore zvavo, havandigone nekuti simba rangu riri muvanhu.
‘‘Ndakatsvaga marita edhiziri 20 000 ayo tanga tichishandisa pakugiredhwa kwemugwagwa uyu atakapihwa nemasahwira edu makambani akatikomberedza,” vakadaro. Vanoti munyaya dzebudiriro idzi vari kushanda zvakare nemumiriri weBuhera Central mudare reNational Assembly, Cde Ronald Muderedzwa, sezvo matunhu avo akaganhurana. “Ini ndakati handishandire Buhera South chete asi Buhera yose. Mukatarisa budiriro yava kuno haina kumbobvira yakaonekwa uyewo ndinodada nekuti kana iko kuParamende vari kutaura zita rangu kuti ndiri pamusoro pakushandira nzvimbo yandinomirira kudarika mamwe maMP,” vakadaro.
Vanoti vagari vemudunhu ravo vari kubatsira nekutema miti iri pedyo nemigwagwa nedonzvo rekudzivirira tsaona.
Online Reporter