Online Reporter
YiNtatheli kaMthunywa
INQWABA yabantu ibuthane eBulawayo Amphitheatre ngeSonto ihlonipha njalo ivalelisa okokucina umdlali wenguqu uTendai “Fire” Ndoro.
Inkonzo yokuvalelisa umuyi iqhutshwe libandla leGuta RaMwari. UNdoro wedlule emhlabeni ngeviki ngedluleyo eSouth Africa. Ubeleminyaka engu-40 yokuzalwa.
Enkonzweni yesikhumbuzo, isikhulumi sinye ngasinye sethule okuhle ngoNdoro. Bababaze ngomsebenzi omuhle owenziwa nguNdoro kunguqu, bebika ukuba utshiye ingqobe kwabasakhulayo lokuthi ukhuthaze inengi labadlali abasacathula ukuthi babone ukuba bayafeza amaphupho abo.
Kukhale abangane bakamuyi, abadlali benguqu kuleli laseSouth Africa, omakhelwane elokitshini leNketa, abakhokheli bamaqembu awadlalelayo, lenkokheli zepolitiki.
Ukugcwala kwabantu enkundleni ye-Amphitheatre kutshengise ukuba umdlali wenguqu lo ubelodumo. Ubengusaziwayo obelenhlonipho kubalandeli benguqu.
“UTendai wayegcwele lothando kuwo wonke umuntu ayephila laye. Siphatheke kabuhlungu ngokufa kwakhe. Wayengumuntu othanda ukuthula, umuntu ogcwele uthando. Imuli yakoNdoro ibonga uxhaso eluthole emphakathini wakoBulawayo,” kutsho umbiko ovele emulini ngesikhathi sesikhumbuzo sokuvalelisa umuyi.
Iwele likaNdoro uTakudzwa, ongunozinti kumdlalo kanobhutshuzwayo, wehlise inyembezi waze waduduzwa ngamawele odumo koBulawayo uJester loViolet Mabaisa.
Ngemva kwalokhu, uTakudzwa uthole ukuqina, wahlabela labanye, evalelisa omunye wakhe ngengoma ababejwayele ukuyihlabela bobabili.
Ubabakazi kaNdoro, uSerivia Chikomo, uthe kube yisikhathi esinzima emulini. Kodwa, bakwamukele, njalo bazaqhubeka ngokuhlonipha impilo yakhe.
UMphathintambo wogatsha lweProvincial Affairs and Devolution koBulawayo uJudith Ncube uthe: “Sesicitshile isibane, ebesikhuthaza ithalenta phakathi kwentsha. Sithakazelela ifa lakhe. Waqina ngaphezu kwenkinga ayelazo. Hamba kahle ndodana yomhlabathi.”
Unobhala weChicken Inn uTavengwa Hara udabuke inhliziyo, wehlisa inyembezi zobuhlungu ekhuluma ngoNdoro.
“Ngizwa ubuhlungu ngibona umfana lo elele enganyakazi. Nguye esaqala ukumthenga lokumthengisela phandle kwelizwe. Ngikhumbula simlanda esuka kuNico United eBotswana ehamba ngilo-Omega Sibanda. Nguye owasinceda ukuthi sinqobe isicoco sethu sakuqala – iNetOne Cup ngomnyaka ka 2012. Ngemva kokubhubha kuka-Adam Ndlovu, wasithwala, saphumelela enkundleni. Yena labanye abafana loTeenage Hadebe kunye loClive Augusto baletha imali kuqembu lethu,” kutsho uHara.
UNdoro ungcwatshelwe emathuneni eWest Park koBulawayo.
