Online Reporter
Nxa insewula isizatshaya phansi abalimi babamatasatasa kuganyulwa amadenje kuthelwa lomquba emasimini, kuvalwa lezikhala ethangweni.
Lakubafundi kunjalo, imihloliso ebhalwa ekupheleni komnyaka nxa isizaqala ukubhalwa bafana lamatheza othola etshaye umlungelunge esiyale lale, abafundi labo baze bafunde langekhefu likaNcwabakazi belungiselela ukuthi lapho kuqala imihloliso sebelungiselele baphelela.
Labana abafundi ababesiba ngamahlongandlebe phakathi komnyaka bengalaleli ababalisi uthola sebehawulisa sekungani yinkukhu enethwe yimbolisamahlanga, uyabe esebona umsebenzi wesikolo usumnengi njalo lezinto ezaziwa ngabanye abafundi uyabe engazazi ngoba uyabe wayekade elova ezifundweni ecabanga ukuthi umbalisi uyamhlupha kanti wayezama ukukhipha umfasimba wokungazi oyabe umgubuzele ebusweni, emnika ilifa elingapheliyo njalo elingatshiyelwa muntu ohamba lalo ngitsho lasemathuneni.
Imfundo ayifani lelifa lezifuyo okokuthi nxa ngakini kunothiwe lisale lisabelana.
Ngikhumbula omunye umngane wami esafunda sonke, wayengezwa, engabhali imisebenzi yesikolo, otitshala basebetshaye baze badinwa lakubazali bakhe imbiko yayifika ngezigigaba ezenziwa ngumntanabo, ngangithi ngimkhuthaza ngemisebenzi yesikolo angaze anaka, wayejwayele ukuphendula athi yena angaqeda isikolo uzaziyela eGoli.
Sathi siqalisa ukubhala imihloliso yokuphela komnyaka saqala ngokubhala ekuseni, yena wahle waginqa wabamanzi te sengani libhiza akade ligijima emjahweni abelungu bebhejile ukuthi lizatshaya intambo bathole imali.
Waze wabuzwa ngumbalisi ukuthi engabe egula na, wathi cha izithukuthuku zaziwela emaphepheni emhloliso. Kungakapheli imizuzu emingaki imihloliso iqalile wayethi seqedile ngahle ngayifunda ivaliwe ukuthi akukho azaphuma lakho.
Banengi abafundi abazithola besesimeni somngane wami lo, abanye ngabaqakathekisa izidakamizwa, kubhenywe ombanje baphuze logologo kuthi nxa umhloliso uqala uthole umuntu wakhona esehlahle amehlo sengani ngumuntu ogade isitimela esingayisiso ngoba sona singaphongumane sime njengebhasi.
Kodwa nxa ulungiselele njengomlimi kuba lula ngoba okunengi kwakhona uyabe ukwazi lalapho impumela iphuma awutshaywa luvalo kakhulu.
Kwababhalayo ekupheleni komnyaka ngilifisela inhlahla, uNkulunkulu alibusise aliphe amandla lingatshaywa luvalo, konke elikufindileyo likukhumbule nxa kuthe kwabuzwa.
Lingatatazeli, liqunge isibindi uzabona ukucabanga owakufundayo.
