‘Sizakukhumbula Mbali’

Fungai Muderere eseFilabusi

INYEMBEZI zehle zingapheli esiqintini sakoHlatshwayo, eFilabusi, eMatabeleland South ngoLwesibili lapho izihlobo, abangane lomphakathi jikelele behlangane ukuzovalelisa okokucina uMbalenhle “Mbali” Sibanda, umsekeli weHighlanders owedlule emhlabeni kungozi yomgwaqo.

Ukufa kwakhe kutshiye isikhala esikhulu ezinhliziyweni zabo bonke abakade bemazi njalo bemthanda.
Isimo besigcwele usizi, kuhlatshelwa ingoma zokholo emangcwabeni. Ukukhala kwabantu kwephule ukuthula ngesikhathi uMbali ebekwa endlini yakhe yokucina.

Ekhulumela imuli, umfowabo kamufi omdala, uMongameli Sibanda, wehluleke ukubamba inyembezi ngesikhathi ebonga bonke abaze ukuzo duduza.

“Sithobeke kakhulu ngenxa yothando, imithandazo losizo esiluthole ngalesi isikhathi. Ukuba khona kwenu, amazwi enduduzo lezenzo zenu zomusa kusinike amandla ngalesi isikhathi esinzima. Njengemuli sibonga umuntu wonke.

Sengathi uNkulunkulu angalibusisa kakhulu,” kutsho uMongameli.
Uthe loba ubuhlungu bokulahlekelwa nguMbali bungakapheli, uthando abalutshengiswe ngabantu abavela kuzo zonke indawo lwenze umdeni wabona ukuthi awuwodwa phakathi kosizi.

Uyisemkhulu kaMbali, uNorman Ncube, laye ubonge bonke abafike bazoduduza.
“Sibonga wonke umuntu ofike wazokhala lathi njalo wanika uMbali ukuvaleliswa okufaneleyo. Imithandazo yenu, amazwi enduduzo losizo lwenu kusithwalise lula lo umthwalo osisindayo. Kasisoze senelise ukulibuyisela umusa wenu, kodwa sikhulekela ukuthi uNkulunkulu alibusise lonke,” kutsho uNcube.

“Kunzima ukuthola amazwi afaneleyo ngoba inhliziyo zethu ziphukile. Kasizange sicabange ukuthi sizafika ngosuku esingavalelisa ngalo othandekayo wethu uMbali. Wayengumuntu olomusa, owayeletha injabulo, ukuhleka lothando loba ngaphi ayekhona. Lamuhla sibeka umzimba wakhe emhlabathini, kodwa ukumamatheka kwakhe, umusa wakhe lomoya wakhe omuhle kuzaqhubeka kuphila phakathi kwethu kuze kube nini lanini. Sizamkhumbula nsuku zonke.”

Umalume kamufi, uDenzel Mabhula, wehlulekile ukufihla usizi ngesikhathi ehlonipha impilo kamzukulu wakhe.
“Kakho umzali, umalume loba ilunga lomdeni elingalungela ubuhlungu obunje. UMbali wayengayisumzukulu wethu kuphela; wayeyindodakazi yethu njalo engumngane wethu. Ukufa kwakhe kusitshiyele isilonda esingelapheki ngamazwi.

“Siduduzwa luthando olutshengiswe emulini yethu kulezinsuku ezedluleyo njalo sicela abantu baqhubeke besikhulekela njengoba sizama ukwamukela lokhu kulahlekelwa okubuhlungu.”

Inkonzo yokungcwaba ibigcwele amazwi enduduzo, imikhuleko lengoma ezithinte inhliziyo.
Abanengi bakhale kakhulu ngesikhathi ibhokisi lisehliselwa egodini.
Abanye babeke amaluba phezulu kwengcwaba likaMbali njengophawu lokucina lothando lenhlonipho.