Online Reporter
Ukuthunjwa kukaSukuzukuduma lulotshwe ngu Geshom MP Khiyaza
Ophezulu Stinta
Isahluko 4
Inkosi uMjaji yathi isichithe amalanga amathathu yekele ukuzila inyanga yeMazizini yatheleka emzini wenkosi. Bangena endlini, yafika yazethula kuMjaji. Yethula kanye lenkulumo eyayihamba ngayo mayelana lomuzi.
Inkosi yayipha indlebe inyanga yeMazizini yakhuluma. Yaveza ukuba njengokuba umthakathi wabonakala wajeziswa, umntwana ngokomthetho kwakufanele adlelwe inkubalo ukuze balahlise inhliziyo zingacabangi ngokwedlulayo.
Inkosi yavuma lokhu, yatsho ukuba inyanga yeMazizini yanikezwa igunya lokwenza konke okuphathelene lemisebenzi yalelikhaya. Bavumelana ukuba kusayo kwakuzafanela idliwe inkubalo.
Ekuseni bathi gwaqa esibayeni abantu abaziwayo sebemelele ukudla leyonkubalo lenkosi. UMaThebe wayekhona laye kanye lezihlobo ezingamaxhegu lezalukazi ezazizala uMaThebe lenkosi ngoba inkubalo yayidlelwa umntakhe Sukuzukuduma. Yabika- ke inkosi injongo yomkhosi lo owawuhlangene. UMjaji wakubeka kwacaca ukuba bona abahluleli yibo osiyazi. Inyanga yeMazizini yaqonda eziko okwasekubaswe owekhanka, yafika yachaya izimpande zayo. Yathatha lodiwo olwaselukhonapho, yaluthela amanzi yaluyakaza ingakalubeki eziko. Yayilokhu iqephuna kancane okuzimpande ijikela kudiwo. Yahluba okulijodo okungathi ligonsi. Yaphosela okuzimpande okumnyama tshu.Amanzi aphenduka abamnyama tshu lawo. Wakwekela lokhu okuzimpande eziko kwavuthwa. Yephula eziko yabuye yengeza ngamanzi aqandayo kwabhubhudla igwebu ediweni.
Yahabula kabili igcwalisa umlomo yabuye yabuyisela eziko. Inkosi yamangala ngesikhathi ibona inyanga ihabula umuthi.Yathula kwathula labanye kodwa belemibuzo. Babengakaze babone inkubalo eyenziwa kanje ngalezozihlahla.
Yakubona lokhu inyanga, yachasisa ukuba izindlela zinengi eziya ekhaya njalo ziyahlangana phambili. Kwamangala amakhehla lezalukazi ngokuphekwa kwale inkubalo yaloluhlobo.
Bathula bakhangela. Yatsho ukuba isitshwala senkubalo siyaqala ukuphekwa kulesitshebo. Sesivuthiwe yaphakululela emnganwini wesihlahla. Yabuye yafaka amanye amanzi ngodiwo seluyakaziwe. Esebila yafaka impande. Yakhupha impande yafaka isitshebo senyama. Kwavuthwa yathatha isitshwala yayaphambi kwenkosi.
Bahlala bonke benza isizingelezi inkubalo iphakathi. Yaqala yona inyanga yasihlephula yadla kancane yasikhafula. Yadobha inkalakatha yethambo yaliluma kancane yabuye yakhafula yasilidlulisela phambili enkosini.Inkosi yenza okufanayo yaqhubela umkayo. Benza njalo bonke bedobha inkalakatha yenyama lesitshwala ungeke watsho ukuba kudliwa inkubalo. Sebeqedile yathatha itshoba, yachela inkosi loMaThebe. Yaphinda yachela labanye ikhuluma amazwi. Abanengi bazibonela ukuba uMzizi kazi lutho ngenkubalo.
Lanxa kunjalo inkosi loMaThebe bazizwa sebeqinile. Badelisa ngayo- ke inkubalo. Inyanga ephekayo yayisebenzisa isihlahla esaziwa yiyo ingqe kungabulali. Inhliziyo yiyo eqiniswa kuphele izibozi ngokuqiniswa.
