admin
SANGANO reZimbabwe Softball Association rakatambira nemawoko maviri danho rakatorwa neInternational Olympic Committee rekuwedzera mutambo wesoftball pane mimwe ichazokwikwidzwa kuTokyo Games 2020.
Svondo radarika, sangano reIOC rakapasisa kuti mitambo mitanhatu inoti baseball, softball, karate, skateboarding, sports climbing nesurfing izokwikwidzwa kumaOlympics mugore ra2020 apo pachaitwa mitambo iyi kuTokyo kuJapan.
Mimwe yemitambo iyi inosanganisira baseball, softball, karate nesports climbing yaimbokwikwidzwa kare kumaOlympics ndokuzomiswa makore adarika.
Zvakadaro, pamusangano wakaitwa neIOC kuRio de Janeiro kuBrazil svondo radarika pakabvumiranwa kuti mitambo iyi idzoswe pamwe nekuwedzera mimwe mitsva.
Achitaura neKwayedza svondo rino, mutungamiri weZimbabwe Softball Association, Stonard Mapfumo, anoti sangano ravo rine mufaro mukuru nekuwaniswa mukana wekutumira chikwata chavo kunokwikwidza kumitambo iyi.
Anoti danho rakatorwa neIOC richasimudzira vatambi vakawanda avo vanoshuvira kukwikwidza kumitambo iyi.
“Tine mufaro mukuru Softball yadzorwa kumaOlympics, izvo zvinove zvinosimudzira mutambo uyu muno.
“Dando iri richasimudzira vatambi vakawanda veSoftball avo vaishuvira mukana wakadai wekukwikwidza kumaOlympics. Isu muno tange tichishanda zvakasimba takamirira kushevedzwa kumaOlympics saka zvatapihwa mukana uyu tave kutowedzera giya nekuti 2020 tichange tiriki kuTokyo.
“Tanzwa nekufonerwa nevatambi pamwe nevarairidzi vakawanda vachitiudza kufara kwavo nekuda kwedanho iri zvinoreva izvo kuti isu sevatungamiri wemutambo uyu tine basa guru rekuona kuti chikwata chedu chaenda kuTokyo mugore ra2020,” anodaro Mapfumo.
Online Reporter