Online Reporter
Mhla ababili betshadayo bayafunga bagomele bethi bazakwehlukaniswa yikufa, ngoba kuyabe kumnandi kujabula izihlobo labangani ngoba kuyabe kulusuku olukhulu kudliwa izibiliboco, kunathwa, njalo kusinwa.
Ensukwini zayizolo ubuthola umfazi lendoda sebeze bempunga kutshengise sobala ukuthi isifungo sabo basigcinile. Kwesinye isikhathi uthole omunye phakathi kwababili laba eseyisiphofu kodwa wayengambalekeli wayemthungamela ngodondolo angabi lenhloni.
Babezala baze baqede ithumbu ungasoze ubabone besilwa kumbe bexabana, yebo babengaxabana ngamazwi ekamelweni labo lokulala bayiqedele khonapho ingaphumeli phandle.
Lezinsuku angazi ukuthi abantu abanengi abathetheyo sebangenwa yini abaselalo iqiniso lothando, uthola umuntu owendileyo kumbe othetheyo elokhu esadlala amandlwane ekhonjwa ngapha langapha ngezinsuku ezimbi ezilemikhuhlane engelaphekiyo efana lengculazi.
Ngamafitshane ngingathi inengi labo abathetheyo abaselalo uthando lweqiniso. Emavikini ambalwa adluleyo sibone kumbe ngithi sikufundile kumaphephandaba, sakuzwa emisakazweni okunye njalo sikubona kubomakhalekhukhwini abantu bebulalana okwenyamazana umfazi athathe ihloka ahlahlele umkakhe okomuntu ohlahlela uJamluti ozadliwa emtshadweni wecinathunjana.
Enye indoda njalo yavalela umkayo emkulwini yathungela ngomlilo batsha qhu kwasala kungumlotha, qede lapho umuntu azibulale ngokuzibophela kumbe anathe umuthi wamagundwane.
Isicelo sami kumbe ngithi isixwayiso sami nxa lingasathandani kumbe nxa uthe wabamba umkakho leyinye indoda ungambulali kodwa mkhombe indlela ngoba kulomhlabeleli owahlabela wathi kungcono ukulobola umfazi oloyayo kulozanika umthombo wakhe kuye wonke umuntu.
Ayixabeni.
