Online Reporter
KULEZINSUKU udaba olusegudwini yinkinga yokusetshenziswa kwezidakamizwa yintsha kanye labanye abadala. Banengi asebethengisa izidakamizwa emalokitshini ehlukeneyo ngoba zibanika imali masinyane kodwa okudanisayo yikuthi izidakamizwa lezi ziphambanisa impilo yabasakhulayo.
Ukusetshenziswa kwezidakamizwa yinkinga yethu sonke okudingeka ukuthi sibambisane loHulumende kunye lamapholisa ukuyilungisa ngoba ukuqhubeka kwayo kutsho ukuphambaniseka kwekusasa lelizwe lethu.
Amapholisa akithi ake aveza amalokitshi ambalwa akoBulawayo okuyikho lapho okugcwele khona izidakamizwa agoqela i-Hillside, Famona, Bradfield, Nkulumane, Makokoba, Thorngroove, Pumula South, eNtumbane laseHope Fountain.
Banengi asebebotshelwe ukuthengisa izidakamizwa kodwa kusobala ukuba basesebanengi futhi abalokhu bekhona phakathi kwethu abalokhu bezithengisa yikho nje ukusetshenziswa kwezidakamizwa kulokhu kuqhubeka.
Izidakamizwa ziyimvukuzane esiphambanise impilo yabantu, umkhonomi welizwe ngoba zingeniswa ngudlu elizweni. Izidakamizwa kubikwa njalo yizo ezenza abantu babe lezibindi zokuphatheka kubugebengu kanye lakuzenzo zobulwane bedinga imali yokuzithenga.
Osekuzwisa ubuhlungu yikuthi lensane ezisafunda uthola zisemabholohweni zisebenzisa izidakamizwa lezi, kusuke kumangalise ukuthi pho esikolo kuyabe kusafundwani abantu bedakiwe.
Kukanengi sisizwa ngembiko yokuba kulabatsha abanengi abasesibhedlela seNgutsheni asebephambene ingqondo ngesizatho sokusebenzisa izidakamizwa. Phela inengi lingazisebenzisa uthola umuntu esehleka yedwa kungelalanto ehlekisayo ngitsho.
Ngesizatho sokuvikela ikusasa lentsha yethu, uHulumende wakithi useqale impi yokulwisa umkhuba wokuthengiswa lokusetshenziswa kwezidakamizwa wafaka njalo leDrug and Substance Abuse Tollfree number lapho abantu abangatshayela khona ucingo bebikela amapholisa ngalabo abathengisa izidakamizwa ukuze bonke baphoselwe emajele ngoba bephambanisa impilo zabantwabethu.
Lesi yisinqumo esihle esithethwe nguHulumende esokuthi uzulu akhululeke enelise ukubika ngobugangi obenziwa yilabo abathengisa izidakamizwa kunye labazisebenzisayo kungelambadalo ngoba kuyiyo kuphela indlela engasisiza njengesizwe kumvukuzane le yokusetshenziswa kwezidakamizwa.
Amapholisa kanye loHulumende bazaqhubeka behlezi izithende bonke abathengisa izidakamizwa kunye lalabo abazingenisa elizweni zivela kwamanye amazwe? Yibo laba abazibona angathi balamabhizimusi aphumelelayo bona bephethe betshaphaza impilo zabantwabethu.
Kungumlandu wethu sonke njengezizalwane zakuleli ukuba sisukumele phezulu sibambisane loHulumende kunye lamapholisa silwisane lokuthengiswa kunye lokusetshenziswa kwezidakamizwa.
Ukuze impi le siyinqobe singathandabuzi ukutshaya ucingo ku 0714647002 nxa bekhona esibaziyo abathengisa izidakamizwa ngoba kuyibo abaphambanisa ikusasa labantwabethu.
IDrug and Substance Abuse Tollfree number ungayithola kumaphephandaba eZimpapers atshiyeneyo kukhasi lokuqala.
