Online Reporter
Ugwalo: Emfuleni wezinyembezi olwalotshwa nguEzekiel S K Hleza
Ophezulu Stinta
Siqhubeka ngogwalo lwethu lwemifula yezinyembezi ebuya nxazonke, ithatha ingxenye ezitshiyeneyo. Ngeviki edlulileyo sitshiye iManama yonke ibizelwe emazibukweni omfula uThuli.
Kwakumenywe kanye lesigoga, kungamelanga kube loyedwa oseleyo emhlanganweni lo. UMaMoyo kungakhathalekile umbiko lo ongaka ophuthumayo, wavele nje wazihlalela ngakwakhe ngesizatho somhelo, kanye lokufutha kwenhliziyo. Wazibona, wazizwa njalo engasela themba lomhlaba kanye lempilo.
Kuyini ayesakuphilela kulumhlaba, okwakhe wayeselinde ukuphumula komzimba kanye lomphefumulo qha.
Wayengelawo amandla okubuyela njalo ayebukela igazi lomntanakhe ligeleza lalwana umfula ngokwesibili, usizi olunganani, ngempela, ozeleyo ulomlandu aluba wayelawo amandla okubamba abantwabakhe ukuthi bangabi yingxenye yezombangazwe wayezakwenza lokho ngothando lomzali kodwa ke konke kwakungaphezu kwawakhe amandla.
Wala sibi lapho uMaNyathi emncenga ngelokuthi bahambe labanengi. Abantwana bakaMaMoyo lapho bebona unina esala labo bathi bazimisele ukuthi bafe njalo bangcwatshe thuna linye lonina. Uthando lomdeni alulamgoqo kuthi loba kuyikufa kulokuzimisela ngelithi sonke sifela umdeni akakho ophuma ngelokuthengisa bonke bazimisele emdenini.
UMaMoyo wabancenga ngamazwi abuhlungu abantwana bakhe, ngelithi kabahambe bayevalelisa umnewabo uDingilingizwe, bayebona ukuchitheka kwegazi lakhe nje okokucina, bamvalelise ukuze laye ahambe ngokuthula.
Sibona amandla enkolo, ngelithi lapho uMaMoyo ekholelwa kwelithi bayemvalelisa umfowabo ukuze aphumule ngokuthula.
Lanxa ekuqaleni abantwana babengavumelani lelokuhamba kodwa ngamazwi enkolo, langethemba elikuwo bancibilika ngelithi labo babesiya valelisa umfowabo ukuze ahambe ngokuthula, kukanti nje kuthiwa ukufa kukodwa ukuphila kukodwa akula kuxhumana okukhona phakathi kwalezi zinto ezimbili. Kulapho 0ke esibamba khona ukuthi kunengi esesihlangane lakho egwalweni lapha njalo sizaqhubeka sihlangana lakho kuqhutshwa, kukholwa okunye njalo kuphunyeleliswa ngamandla enkolo. Kwathi abantu bonke sebethe gwaqa kubuthenwe kwadingwa unakaDingilizwe, wasweleka. Kusobala umbuthano wawungaye, akukho okwakungaqhubeka engekho.
Kwaphuma amasotsha ngemota esiyamthatha, lapho ke kwakungasakhathalekile ukuthi uyafuna kumbe kafuni. Ekufikeni kwabo bamthola ephethe iculo lenkosi ehlabelela, ngempela alikho ithemba ayesele lalo ngaphandle kokuthemba kuye uMdali wezulu lomhlaba.
