admin
Abel Ndooka
MUIMBI weSungura Jonathan Siastumuzira — uyo vazhinji vanoziva saMadzibaba Gina kana kuti Mr Chinhoyi — akavhura studio kuChinhoyi ichange ichitsikisa mhanzi yevamwe vaimbi vemusambo uyu pachena.
Mr Chinhoyi, uyo anozikanwa zvikuru achishanda nevamwe vaimbi nekusimudzira vanhu vanotambura, anoti ane shuviro yekuona vamwe vake vachisimukira ndosaka akafunga zvekuvhura studio inonzi Stumu Records.
Studio iyi ichange ichibika misambo yemhanzi yakasiyana inosanganisira Sungura, Jazz neZim-dancehall.
“Mhanzi ndinoziva kuti inorwadza zvikuru zvekuti kana usina puromota iwe muimbi zvinogona kukuremera kutsikisa mhanzi yako. Saka ini ndakati regai ndivhure studio yangu iyi Stumu Records ndigobatsirawo vamwe vaimbi vatsikise mhanzi yavo mahara.
“Handisi kuzviita kuti ndipihwe mbiri, kwete, asi nemwoyo unoda kuti vamwe vaimbi vasimukire nekuti vanotoraramiswa nemagitare,” anodaro Mr Chinhoyi.
Muimbi uyu anotungamira chikwata cheStumu Boys uye anozivikanwa nenziyo dzinosanganisira KwaJowa, Handidi Kutambura naMbuya Vheneka.
“Vaimbi tinofanirwa kubatana uye kushanda pamwechete nekuti ndizvo zvinoita kuti tisimukire tese. Takaita humbimbindoga hapana kwatinombosvika. Ini ndakasununguka kushanda nevamwe vese uye handina wandinokwikwidzana naye, vese ndivanamukoma wangu nehanzvadzi saka ndichashanda navo,” anodaro.
Mr Chinhoyi anoti parizvino ari mushishi kubika dambarefu rake rechipiri rinonzi Ndizvo Zvazvave uye ari kutarisira kushanda nevamwe vanosanganisira Andy Muridzo naProgress Chipfumo.
Online Reporter