Online Reporter
Munyori weKwayedza
ZIMBABWE iri kutora matanho akasimba akanangana nekuvandudza indasitiri yezvekugadzirwa kwemishonga yekurapa, kusanganisira kuvambwa kwehomwe yemari inoita kuti mishonga iyi nezvimwe zviwanikwe nemutengo wakaringana.
Rimwe donzvo guru nderekuderedza mari inoshandiswa pakutenga mishonga yekurapa kunze.
Senzira yekusimbaradza kuwanikwa kwemishonga yekurapa munyika, mari yemutero weshuga (sugar tax) ichashandiswa zvekare mukugadzirwa kwemishonga yakakosha.
Matanho aya akaziviswa negurukota rezvekuburitswa kwemashoko nenyaya dzenhepfenyuro, Dr Jenfan Muswere, apo vaitaura kuvatori venhau nemusi weChipiri chino mushure mekupera kwemusangano wedare reCabinet.
Vachitaura pamusoro pechirongwa cheZimbabwe Industrial Reconstruction and Growth Plan (2024–2025), Dr Muswere vanoti kutsigirwa kweindasitiri inogadzira mishonga yekurapa kwakakosha kuitira kuti iwanikwe nemutengo wakakodzera.
“Kuitira kuti kukura kwePharmaceutical Value Chain kuvepo, Hurumende yeZimbabwe icharamba ichitsigira NatPharm uye nekuona kuti mishonga yemuno iri kutorwa nemapoka (ezveutano) anobatsira veruzhinji pamwe neakazvimirira,” vanodaro.
Dr Muswere vanoti pachavambwawo homwe yePharmaceutical Revolving Fund yekutsigira indasitiri inogadzira mishonga yekurapa.
Vanoti mari yemutero weshuga ichashandiswa zvekare mukugadzirwa kwemishonga yakakosha.
Hurumende gore rapera yakawana mari inodarika US$30 miriyoni kubva pamutero weshuga zvichitevera kudzikwa kwemutemo weStatutory Instrument 16 of 2024, the Customs and Excise (Tariff) (Amendment) Notice, 2024 (No 5) on February 9, 2024.
Mari iri kubva pamutero iri kushandiswawo kutenga michina yekuvheneka chirwere chegomarara muzvipatara zveHurumende.
