Online Reporter
Abel Ndooka
KUNOTSVA demo kugosara mupinyu kunyika yeMorocco nemusi weChishanu chino apo chikwata cheWarriors chichasangana necheBurkina Faso mumutambo wehushamwari.
Chikwata chemaWarriors chevakuru chichatamba mitambo miviri yehushamwari neBurkina Faso uye mumwe wacho neNiger.
Mitambo yese miviri iyi ichatambirwa kuMorocco.
Murairidzi wemaWarriors – Michael Nees – akatakura chikwata chine vatambi vaanogara achishevedzwa nevamwe vatsva.
Achitaura ari kuMorocco pavhidhiyo yakaburitswa papeji reX reZIFA mushure mekunge chikwata chake chasvika kuMorocco, Nees anoti gadziriro dzavo dziri kufamba zvakanaka.
Anoti achashandisa mitambo miviri iyi kupa mikana kune vatambi vakasiyana avo vaasati amboshevedza kuti vazotamba muchikwata chake.
“Tiri kuda kushandisa mitambo iyi kuvaka chikwata chedu uye kumbotarisa vatambi vakasiyana avo takashevedza kuti vazopinda muchikwata chedu.
“Tikatarisa ipapa muchikwata chedu tichange tiine vatambi vatsva vachatamba mumid-field avo vatange tisingambotambise saka tinoda kumbovaona kuti vanotamba sei.
“Kune vamwe vatambi vainge vakakuvara kwenguva refu vachangodzoka vakaita saTino Kadewere naBill Antonio saka tinoda kumbovatarisa. Kune vamwe zvekare vatakashevedza kekutanga avo tinoda kumbopawo mikana pamitambo miviri iyi apo tiri kuvaka chikwata chedu,” anodaro Nees.
Zvakadaro, apo Nees ari kuMorocco nemaWarriors achitatsurana neBurkina Faso neNiger, chimwe chikwata chemaWarriors chiri kuSouth Africa kumutambo we2025 Cosafa Cup.
MaWarriors kumutambo uyu ari muboka reGroup A umo achasangana neSouth Africa, Mauritius neMozambique.
Chikwata chenyika ichi chiri kutungamirirwa nemurairidzi wemaYoung Warriors Under 20, Simon Marange.
