admin
Cornelius Luphahla
IQEMBU loMkhankaso wamajaha elidabuka eFolosi seliveze ukuthi lonyaka lizaphakulela abalandeli balo imbabazane yedlalade elitsha njalo lizimisele ukuvakatshela indawana zonke zakuleli lijabulisa uzulu.
Iqembu leli elihlabela umculo wembube lenza izimanga njalo selibhode amazwe amanengi limenywa ukuyajabulisa abantu.
UMthunywa ukhulumisane lomunye wenkokheli zaleliqembu uKhangelani Mlotshwa wachaza ukuthi iqembu leli selilesikhathi eside balisungula.
“Iqembu leli lasungulwa ngo-1989 ngu Denis Nkomo ngemva kokuphuma kwakhe kuqembu leBlack Umfolosi.
Leliqembu liqukethe amadoda angu-16 noma nje abanye bakhona sebebadala bengasenelisi ukugida sebesincedisa ngokunye nje,” kutsho uKhangelani.
UMlotshwa uqhubekele phambili njalo waveza ukuthi njengeqembu labaculi sebevakatshele indawo ezinengi kakhulu.
“Thina njengeqembu elidala sesivakatshele amazwe amanengi kakhulu agoqela iZambia, Namibia, Botswana kanye lakwamanye amazwe sihamba sijabulisa abantu. Ngokunjalo abanye bethu sebemenywe emazweni ehlukeneyo ngenxa yemisebenzi yabo emihle.
“Lathi-ke njengeqembu siyake sivakatshele amazwe aphetsheya simenyelwe ukuyajabulisa abantu. Kumnyaka ophelileyo sike samenywa kweleEgypt ukuyajabulisa abantu kwasokusehlula ngoba saswela imali yokuya khona.
Ngokunjalo-ke sesike sakhipha amadlalade ngakho idlalade esalikhipha lavusa usinga koMthwakazi ngelithi Zimi Manzonzo,” kuchaza uMlotshwa.
UThokozani Dube onguye okhokhela leliqembu ubikele intatheli ukuthi lonyaka bakhangelele ukuvakatshela uzulu bemjabulisa ngengoma zabo ezimnandi.
“Lonyaka sikhangelele ukuvakatshela indawo zonke lapha koMthwakazi sijabulisa abantu ngomculo wethu.
Ekuhambeni kwethu lapha kasikhethi noma nje umuntu engasimema emdlalweni wakhe kumbe emkhosini othile sikhululekile ukuyafika khona,” kutsho uDube.
UDube uqhubekele phambili njalo wachaza ukuthi sebeke babhuqa wonke amaqembu embube eVictoria Falls.
“Kumnyaka ophelileyo sitshaye sabhuqa wonke amaqembu embube kulo umhlubulo weVictoria Falls. Ngemva kwalokho sisuke saya emncintiswaneni weChibuku Neshamwari koBulawayo kodwa asizange sangena emncintiswaneni lo asazi ukuthi kungani bengasasingenisanga.
“Noma kunjalo kasideli ukujabulisa abantu sizaqhubekela phambili ngomsebenzi wethu lo ngoba abantu bayawujabulela kakhulu,” kuphetha uDube.
Online Reporter