Online Reporter
Kingstone Mapupu
DUNHU ramambo Chireya, munharaunda yeGokwe, kuMidlands, rakaputirwa negore dema zvichitevera nyaya inonyadzisa nekudzikisira tsika dzechivanhu munzvimbo iyi, iri pamusoro pemhondoro kana kuti svikiro reko, iro rinonzi rakawanikwa richiita bonde nembudzi mudanga remuvakidzani pakati pousiku masvondo matatu adarika.
Liberty Marariromba (26), anova Sekuru Nevana, achibva mumusha waSabhuku Nevana, anonzi nomusi wa11 Nyamavhuvhu gore rino nenguva dza11 usiku akawanikwa achiita bonde nesheshe mudanga raMai Easther Gasura (50), vemumusha waSabhuku Museru. Nyaya iyi yakazosvitswa kudare raMambo Chireya, VaHenry Chidzivo (58), avo vakazoikwidza kune mamwe madzimambo edunhu reGokwe. Vakuru ava vanoti Mambo Njelele, Mambo Nemangwe naMambo Sahi.
Nokudaro, nyaya iyi yakazoitwa mukomberanwa nemadzimambo mana aya nemasadunhu avo, anosanganisira Nembudziya, Goredema naheadman Nemangwe.
Dare iri rinonzi rakaitirwa panzvimbo yeNezanda-Gumiremhete, uko mhondoro iyi yakange yashevedzwa, ikarega kuenda, ndokuzotongwa isipo.
Mambo Chireya vanoti Mai Gasura, vanove mumhan’ari munyaya iyi, vakauya kudare iri ndokutsanangura mafambiro akaita zvinhu, pavakawanikidza svikiro iri richishinha nechipfuyo.
Mambo Chireya vanoti mhondoro iyi, iyo inogara yakapfeka mbatya nhema dzechivanhu, vakaigashira makore matatu adarika, vakaiuraira nzou patsika dzechivanhu dzeko, ikapembererwa. Zvinonzi changa changosara kugashidzwa nyanga dzenzou chete, sezvinoitwa kunzvimbo iyi.
“Mhondoro yataive nayo yakaparura kana kuti kufa mugore ra2002, ndokuzoburuka mhepo yemhondoro iyi makore matatu adarika. Tisati taigashira mhondoro iyi, takafamba kuna vanonzi Mbuya Nehowa kuMakonde tichinobvunzira. Vakatitaurira kuti endai munogadzira chivanhu . . . kuti muone kuti imhondoro yechokwadi here kana kuti yemanyepo,” vanodaro Mambo Chireya.
Vanotizve dare remadzimambo mana iri nemasadunhu avo rakaitwa svikiro iri risipo, amai vane mbudzi yakaitwa mudzimai ava vakapa umboo hwavo. Magwaro emudare iri ezvakataurwa naMai Gasura akatsinhira kuti vakawanikidza mhondoro iyi ichiita bonde nembudzi mudanga ravo.
“Ichokwadi mhondoro yedu iyi ndakaiwanikidza mudanga rangu rembudzi ichiita bonde nembudzi yangu sheshe nomusi wa11 Nyamavhuvhu kuma11 usiku. Semunhu akange achangopinda mumba, ndakazonzwa mbudzi kuchema, ndokubuda mumba ndisina kubatidza tochi, ndokunoibatidza ndasvika padanga, ndikaona svikiro iri riri mudanga, rakavhura machira emudzimu matema, vachiita bonde nembudzi,” vanodaro Mai Gasura.
Vanoti vakabvunza sekuru ava kuti vaiitei, vachibva vapindura kuti kwaive kudhakwa.
“Vakazogara pasi vachikumbira ruregerero, ndikavati kwaive kuromba kwavaiita, semunhu ane madzimai matatu, zvisinei kuti mumwe akazoenda zvake. Ndakavati ndivo vaiuraya mbudzi dzangu sezvo ndaive nembudzi 38, idzo dzakazopera kufa ndikasara ne6 chete pane iyo yavaishereketa nayo. Tsvimbo yavo yaive pasi kunze kwedanga, paine mascud avo maviri nemushonga wedhibhi wavaida kunomwaya mombe dzavo,” vanodaro Mai Gasura.
“Ndakazovati chibudai mudanga mangu, ndichibva ndatora mascud avo maviri ndikaabereka muchari mangu, ivo vachikumbira ruregerero, vachiti vaizondiripa neUS$300, vakabva vaunza US$100 ipapo, vakazotumira US$200 nemunyai wavo Leon Kasura (45), uyo akazosiira mwana wangu, ndikazoiona iriko,” vanodaro Mai Gasura.
Mambo Chireya vanoti mhondoro iyi vakaitonga isipo, kukawiriranwa kuti imbomire kutungamirira dunhu rose reGokwe sesvikiro.
“Svikiro iri rakaramba kuuya kudare, tikaritonga risipo kuti rimbomire kutungamirira nyaya dzose dzechivanhu mudunhu reGokwe, uyewo kune mombe ina dzakanzi nedare ribvise, kuchenura dunhu iri nekuwanikwa kwarakaita richirara nembudzi.
“Mbudzi yakashereketwa nayo iyi ichaendeswa kwamambo, uko inonouraiwa ichinodyiwa nemasahwira,” vanodaro Mambo Chireya.
Vanoti mhondoro iyi yave kuwanikwawo ichitsaudzira tsika dzechivanhu, sekutsikisa mutanda, kubhadharisa maUS$25 kuvanhu vanoda kubatsirwa nekuwanikwawo mumabhawa ichifara nevoruzhinji.
Mutevedzeri wemutauriri wemapurisa mudunhu reMidlands, Assistant Inspector Xolani Dube, vanoti vaida kutanga vaita tsvakurudzo huru nezvenyaya iyi ine chokuita nesvikiro iri.
“Regai tigotsvaga nyaya iyi zvizere. Tichadzoka kwamuri tataura nevariko,” vanodaro Asst Insp Dube.
