Online Reporter
Abel Ndooka
CHIKWATA chenyika checricket chemaChevrons chichaenda kuBangladesh munaKubvumbi kunotamba nemaTigers ekunyika iyi mumitambo miviri yeTest Match Series.
Mutambo wekutanga uchatambwa kubva nemusi wa20 Kubvumbi kusvika musi wa24 kunhandare yeSylhet International Cricket Stadium kuSylhet.
Nerimwe divi, wechipiri uchatanga musi wa28 Kubvumbi uchizopera musi wa2 Chivabvu uye uchatambirwa kunhandare yeZahur Ahmed Chowdhury kuChattogram.
Muchinyorwa chakabva kuZimbabwe Cricket, managing director wesangano iri – Givemore Makoni – anoti mutambo uyu wakakosha sezvo uchabatsira kuti vatambi vavo vawane ruzivo rwepamusoro-soro rwecricket.
“Tine mufaro kuzivisa nezvemutambo wedu uyo tichaenda kuBangladesh kunotamba Test Match Series. Izvi zvichapa vatambi vedu mukana wekuti vawane ruzivo rwakakosha rwemutambo uyu panguva inenge yakaoma zvinhu.
“Mutambo weTest Match wakakosha pakusimukira kwedu uye tiri kutarisira kunotamba zvinonwisa mvura apo tichasangana nechikwata chepamusoro cheBangladesh,” anodaro Makoni.
MaChevrons akapedzisira kuenda kunotamba kuBangladesh mugore ra2020 apo akatamba mutambo mumwechete weTest Match uyo wakazohwiniwa nemaTigers.
Mutambo wemaChevrons wekuBangladesh unotevera mitambo miviri ichangobva kutambwa nechikwata chenyika ichi yeTest Match apo chakasangana neAfghanistan pamwe neIreland nguva pfupi ichangodarika.
