Online Reporter
Ethel Ncube
KULENDODA yelokitshini leOld Pumula koBulawayo engene eNorthwards Hostel ku4th Avenue Extension ngenhloso yokutshontsha yabanjwa isijumekile esofeni ngoMvulo kuyonale iviki.
Umsolwa uRichard Vundla oleminyaka engu-25 yokuzalwa kuvele ukuba ubesanda kuphuma ejele lapho abepika khona. Kubikwa waphuma ejele ngoMfumfu nyakenye.
Umtshutshisi uJoseph Rugara ubikele inkundla ukuba umsolwa wangena endlini yabantu kungelamvumo.
“URichard wahamba ema-hostel la wafika wavula wangena ngefasiteli indlu ikhiyiwe wathi esephakathi wahlala esofeni wacina ejunywa yibuthongo walala. Umnikazi wendlu wezwa umsindo wacabanga ukuba ngumntanake ongumfana ongabe esevukile wamemeza wezwa kungelamuntu osabelayo.
Wavula umnyango esiyakhangela wathola kulomuntu ehlezi esofeni ejunywe yibuthongo. Bambuza ibizo lakhe waphendula ukuba nguRichard. Umnikazi wendlu wabiza unogada owafika wabopha umsolwa wamusa enkambeni yamapholisa eKhumalo.
Umantshi uPatience Madondo ugwebe umsolwa inyanga ezine zokuyapika ejele.
