Online Reporter
Muchaneta Chimuka
MAPURISA eZimbabwe Republic Police (ZRP) akasunga murume wekwaSabhuku Kodobo kwaMambo Nhema kuShurugwi nemhosva yekuponda mukuwasha wake achimupomera kurambira nenharembozha yake nemusi weMuvhuro svondo rino.
Mutauriri wemapurisa mudunhu reMidlands, Inspector Emmanuel Mahoko, vanotsinhira nyaya iyi.
“Nomusi wa5 Gunyana 2025, musungwa anonzi Last Bazangi anova tsano vemufi ari wekwaSabhuku Madyangove kuChibi akashanyira hanzvadzi yake, Patience Joka (37), uyo aigara nemurume wake anonzi Peter Chigamanye (55) kwaSabhuku Kodobo kwaMambo Nhema, kuShurugwi. Zvinonzi nemusi wa8 Gunyana 2025 nenguva dza2000 hours, Joka akaenda kunorara achisiya vaviri ava vari muimba yekubikira vachikurukura,” vanodaro Insp Mahoko.
Vanoti mushure memaminitsi mashoma, Chigamanye akaenda kuna Joka ndokumuzivisa kuti murume wake akanga atora nharembozha yake nechisimba uye akanga asisadi kuidzorera.
“Pakarepo, Bangazi anonzi akamhanyira kubhedhuru kwevaviri ava akabata badza. Akabva atema Chigamanye mumusoro kakawanda zvakaita kuti apunzikire pasi apo mukuwasha uyu aisaziva zvaitora nzvimbo. Chigamanye akamhanyiswa kuchipatara cheShurugwi District Hospital uko akasvikofa mushure mekupihwa mubhedha. Bazangi akabva akatiza kubva panzvimbo iyi,” vanodaro.
Nomusi wa9 Gunyana, matikitivha ekuchikamu cheCriminal Investigations Department (CID) akaita ongororo maringe nenyaya iyi achibva abudirira kusunga Bazangi apo akamubatikidza ari pachiteshi chinosangana mugwagwa weZvishavane- Masvingo.
“Musungwa uyu ari kutarisirwa kupinda mudare nemhosva yehumhondi. Tinokurudzira veruzhinji kuti kana paita kusanzwisisana vaedze napose pavanogona kugadzisira nyaya dzavo murunyararo uye kuti varemekedze hupenyu hwevanhu nekuti vakawanda vari kufa kuburikidza nemhirizhonga dzerudzi urwu,” vanodaro.
Bangazi achatongwa nemhosva yehumhondi pasi pechikamu chemutemo weMurder As Defined in Section 47 of the Criminal Law Codification and Reform Act.
Parizvino akavharirwa mutirongo uye badza raanonzi akashandisa mukupara mhosva iyi rakawanikwa riri pamba pake pachivanze iro richabuditswa mudare seumbowo.
