admin
IKHEFU lokunanza kwethu amaqhawe lamaqhawekazi esizwe kunye lebutho lakuleli lonyaka, seledlule. Kasidinwa ukukhuthazana ukuthi sitshayele ngonanzelelo kunye lokuthi silondoloze imithetho yonke yemigwaqweni.
Kule iviki sizaxoxa ngendaba zokutshayana kanye lokubulalana besesiphetha ngokuxwayisana labantwana bezikolo abakukhefu ngezezidakamizwa ukuze baqakathekise ukufunda ingwalo zabo hatshi ukudakwa beyengwa ngabanye ikakhulu abadala kulabo.
Kwezokutshayana, kulendoda eyaziwa ngegama lokuthi Paul okubikwa itshaye omunye wayo uBulisani Ndebele oleminyaka engu-25 yokuzalwa ngemva kokuxabana etshwaleni. Lokhu kwenzakale koBadala eNyathi. Bakwethu sihlala silazisa ukuthi ematshwaleni lapha yikho lapho okuqhamuka khona amanye njalo amacala amakhulu afana lokubulalana ngokwakho.
Akukhathalekile ukuthi lixabana ngani kumbe lenzani kodwa, zamani ukuba ngabantu abalobuntu, isineke lokuzithiba; lazi ukuthi impilo iqakathekile ukwedlula okunye konke. Khathesi sikhuluma nje umetheswacala usesezandleni zamapholisa okutsho ukuthi umangoye usezalala eziko emzini wakhe.
UNdebele laye ulimele okokuthi sokumele atshitshele esibhedlela atshiye ezinye zonke inhlelo zakhe; kukanti ingabe ababili laba bebezithibile baxekana lengxabano kwaze kwaba kusasa ubulembu bukaMagwebu sobuphelile; ingabe baqhubeke kuhle ngenhlelo zabo. Pho-ke kwalile kodwa isiphetho sithi bakwethu masingafiki esigabeni sokutshayana singabantu. Kulicala njalo kuyalimaza kumbe ukubulala ngokwakho.
Banengi-ke ababotshelwa amacala okutshaya abanye. Ngingeke ngabaqamba ngibaqede bonke. Abanye batshaya omkabo emakhaya kodwa siyazi nje ukuthi intshumayelo yokulondoloza ukuthula ezindlini isidumile. Umfazi kasafakwa isandla bo! Licala njalo kukukhipha isithunzi kulezinsuku ngoba abantu bezakubona sengathi awusiyona indoda eqotho. Okwenza sikhulume ngodlakela lolu yikuthi kwezinye izikhathi lucina lusiba lezidumbu phansi.
Kasixekaneni lomkhuba wolaka sibe lothando. Uthando kaluladlakela, kalula mona njalo kalula mhawu, kalula laka lokunye okunjalo. Uthando lulomusa lozwelo okuzindingeko ezimqoka ekulondolozeni ukuthula.
Ukubulalana kubi! Angazi ukuthi singatshumayezana lokukhuthazana kanjani ngalelicala bakwethu. Akukhathalekile ukuthi uphoxwe ngubani. Angabe engumkakho, umakhelwane kumbe uzibani, xola ulungisise udaba lwakho ngendlela enhle elokuthula kumbe esemthethweni okuzenza sonke siqhubeke siphila kuze kube lusuku lukaNkulunkulu; hatshi ukuthi sichithe igazi loluntu mahlayana nje.
Ngizalubambela lapha udaba lokubulalana umbulali ejongile ngoba luvele luhlasimulisa umzimba sikhathi sonke nxa kukhulunywa ngalo. Yikho kusiba lezililo lapho okubhubhe khona umuntu ngoba kasikuthakazeleli lokhu.
Kodwa-ke pho nxa kusiba lomunye okwenza ejongile uthiwani pho? Umuntu osuke abe lochuku nje, umona kumbe ukuvumela ulaka abone sengani angabhodlisela phezulu komunye umuntu. Kodwa-ke esikunanzelelayo yikuthi akekho okumelayo ukufa komunye umuntu. Kasilweni lezingozi, izigilamkhuba, imikhuhlane lokunye hatshi ukutshayana lokubulalana!
Kwezezidakamizwa ngizalikhumbuza ngabacuphi beZimbabwe Republic Police abeCID Drugs and Narcotics Section abasebenza ebusuku lemini kundawana zonke zelizwe, emingceleni kanye lasemagcekeni ezindizamtshina besenqabela ukusetshenziswa, ukuthengiswa, ukuthwalwa lakho konke okunye okungenziwa ngezidakamizwa.
Baphatha njalo indaba zemithi yonke lokunye okunjalo, okungavunyelwa ngumthetho weMedicines and Allied Substances Control Act (Chapter 15:03). Ngokunjalo, bonke abangabe bephatheka kwezezidakamizwa yazini ukuthi akula lapho eliyakhona, liyatsha kuphela.
Ikakhulu ngalesi isikhathi sekhefu ngoba abacuphi laba bayabe bevele begcwele kunye lasemalokitshini. Inengi litholakala lilamabhola embanje, I“ngoma” (broncleer) lokunye. Konke lokhu kuyahlanyisa njalo kuyabulala ngoba akulungelanga impilakahle yoluntu.
Bantwana bezikolo, lingayengwa-ke ngabadala kulani besithi lisebenzise izidakamizwa ngoba bezalitshiya esithubeni selibotshwa lilodwa licine lingasabuyelanga ezikolweni. Fundanini ingwalo zenu ukuze liphumelele libe lekusasa elihle.
Amankazana asengozini yokukhomba acine engasaqhubekanga ngezifundo esezithwele ngezisu ezingelabanikazi. Ubude kabuphangwa. Fundani, likhule lizikhethele impilo enhle, hatshi ukusetshenziwa.
Hayi, kuhle-ke bakwethu. Ayixabene, sidibane kwelizayo. Umlobi utholakala ku 0735752386 / 0716616987 / 0783185092 / [email protected] co.zw. …
Online Reporter