admin
Le yindoda ngebizo nje
NGITHEMBA uqine saka Khulu. Ngingumama oleminyaka yokuzalwa engu-24 njalo ngilomntwana oyedwa. Khulu ngenda kuminyaka emibili edluleyo. Uhlupho lwami nantu Khulu, lokhe sahlala sonke lomkami sahlangana emacansini okwenyanga eyodwa kuphela. Umkami licinathunjana ngakibo kungakho sihlala labazali bakhe.
Ekuqaleni ngangibona angathi ukuzithwala kwami yikho okwakumenza angafuni ukuhlangana lami emacansini.
Kodwa lokhe ngabelethayo umntanami seze eleminyaka emibili lokhe singakahlangani emacansini. Ngake ngambuza ukuthi kungani engafuni ukuhlangana lami wathi ayekufuna yikuba lomntwana okuthiwa ngowakhe nje kuphela kanye lomfazi ozamwatshela. Abazali bakhe ngababikela kodwa bathi ngenze lokho okufunwa ngumkami. Nceda Khulu sengidubekile.
Impendulo
Mzukulu angeke ngithi yehlukana lomkakho kumbe hatshi kodwa kuyangimangalisa ukuthi kungani engakukhululi ubuyele ngakini njengoba kukhanya ukuthi kalandaba lawe? Mhlawumbe ukuthi athi wayefuna ozamwatshela yikho okumeza akwekele uhlale laye. Kodwa mina mzukulu ngithi geza izandla uvalelise ubuyele ngakini, udinge umsebenzi uzisebenzele ukuze ugcine umntanakho.
Okunye ongakwenza yikuqina ngomthandazo ngoba kungenzakala ukuthi umkakho kulomoya omhleziyo. Mzukulu akuzame ukuya emasontweni ukhulekelwe lawe uzikhulekele ngoba mhlawumbe umkakho ulomoya omhleziyo. Umoya lo ngeke uphume nje nxa engasatholanga usizo lokukhululwa kiwo. Okokucina hlala phansi ucabangisise ubone ukuthi okungcono yikuphi kulokhu engikutshele khona.
Kayisuye umfazi engimfunayo
Ngithemba iNkosi ikugcinile Khulu ngoba lami isangipha amandla. Khulu ngiyindoda eleminyaka engu-23. Uhlupho lwami yikuthi njengoba sengikhulile kumele ngizidingele umuntu ozakuba ngusomoya wami. Ngihlangane lentombi umoya wami wathatheka kodwa uhlupho engilalo yikuthi ukhona omunye ebesithandana kodwa uhlala eGoli.
Intombi le eseGoli iyaziwa ngakithi njalo bayayithanda kakhulu. Lo mina engimthandayo abangakithi kabafuni kuzwa ngitsho ngaye. Bathi sehlukane kodwa inhliziyo yami ibuhlungu. Ngenzeni Khulu ngeluleka?
Impendulo
Mzukulu akula hlupho lapha inhliziyo iyazikhethela kayikhethelwa. Okuqakathekileyo yikuthi wenze lokho okufunwa yinhliziyo yakho ngoba kusasa uzakhala ngezihlobo zakho. Lalelisisa okufunwa yinhliziyo yakho wenze khonokho.
Ngibona angathi okwenza izihlobo zakho zithande intombi eseGoli yikuthanda ukudla. Wena hlala phansi lonyoko umtshele okufunwa yinhliziyo yakho ungaqali ukuthabisa abantu ngalokhu okuzakuhlupha ngoba phela ukuthatha yisinqumo sempilo yakho yonke. Kungakho ngeke uhlale lomuntu ongamthandiyo ukhangelele ukuthi umuzi wenu uzaqina, ngeke kwenzakale lokho. Ekucineni mzukulu wothi ngithi ungaphileli abanye abantu. Sikhuluma nje ngubani owaziyo ukuthi ekhonale eGoli wenzani, kungenzakala ukuthi abuye esekuphathele umkhuhlane.
Online Reporter